ఎలక్ట్రిక్ బైక్కు ఛార్జింగ్ పెడుతుండగా కరెంట్ షాక్ కొట్టి 23 ఏళ్ల యువతి ప్రాణాలు కోల్పోయింది. మహారాష్ట్ర సతారా జిల్లా కరాడ్ మండలం మోప్రోలో ఆదివారం ఈ ఘటన జరిగింది. ఈ అనూహ్య పరిణామంతో యువతి కుటుంబసభ్యులు తీవ్ర విషాదంలో మునిగిపోయారు.
మృతురాలి పేరు శివానీ అనిల్ పాటిల్. కొంతకాలం క్రితం ఆమె కుటుంబసభ్యులు ఈ-బైక్ కొనుగోలు చేశారు. ఆదివారం మధ్యాహ్నం ఎలక్ట్రిక్ స్కూటర్కు ఛార్జింగ్ పెట్టేందుకు ప్రయత్నించింది శివానీ. ఒక్కసారిగా కరెంట్ షాక్ తగిలి.. విలవిల్లాడుతూ కుప్పకూలింది.
అప్రమత్తమైన కుటుంబసభ్యులు ఆమెను హుటాహుటిన ఆస్పత్రికి తరలించారు. అయితే.. అప్పటికే ఆమె ప్రాణాలు విడిచినట్లు వైద్యులు నిర్ధరించారు. ఈ ఘటనపై కరాడ్ గ్రామీణ పోలీస్ స్టేషన్లో కేసు నమోదైంది.
వరుస ప్రమాదాలు: దేశంలో ఈ-బైక్స్కు ఆదరణ క్రమంగా పెరుగుతోంది. అయితే.. అదే సమయంలో ఎలక్ట్రిక్ స్కూటర్ల కారణంగా అనేక ప్రమాదాలు జరగడం చర్చనీయాంశమైంది. ఎలక్ట్రిక్ బైక్ ఛార్జింగ్ చేస్తుండగా మంటలు చెలరేగి వెలువడిన పొగతో ఊపిరాడక తండ్రీకూతురు ప్రాణాలు కోల్పోయారు. ఈ విషాద సంఘటన తమిళనాడు, వెల్లూరు జిల్లాలోని చిన్న అల్లాపురమ్లో మార్చి 26 రాత్రి జరిగింది.
తమిళనాడులోనే తిరువళ్లూరులో ఇంటిముందు పార్క్ చేసిన స్కూటర్ కాలిపోవడమే కాకుండా.. ఇంట్లోని సుమారు 3 లక్షల విలువైన సామగ్రి అగ్నికి ఆహుతైంది. కొంతకాలం క్రితం సికింద్రాబాద్ కంటోన్మెంట్ డిపోలో ఓ ఎలక్ట్రిక్ బస్సు ఛార్జింగ్ పెడుతుండగా.. మంటలు చెలరేగి దగ్ధమైంది. కర్ణాటక శివమొగ్గ జిల్లాలో ఛార్జింగ్ చేస్తుండగా ఎలక్ట్రిక్ ద్విచక్ర వాహనం మంటల్లో కాలిపోయింది. మహారాష్ట్ర పుణెలోనూ ఓ ఎలక్ట్రిక్ స్కూటర్లో ఒక్కసారిగా మంటలు చెలరేగాయి.
