Duronto Express collided with a Bolero vehicle: తెల్లవారుజామున 2.30 గంటలు.. సికింద్రాబాద్ నుంచి విశాఖపట్నం వెళ్తున్న దురంతో ఎక్స్ప్రెస్.. రైలు వేగంగా దూసుకుపోతుంది.. ప్రయాణికులంతా గాఢనిద్రలో ఉన్నారు. ఏలూరు జిల్లా భీమడోలు దగ్గరకు రాగానే ఒక్కసారిగా భారీ శబ్ధం.. ఏమైందోనని ప్రయాణికులంతా ఉలిక్కిపడి లేశారు. తీరా లేచి చూసేసరికి.. ట్రైన్ ఢీకొని ఓ వాహనం తుక్కుతుక్కైంది. ఈ ఘటనతో రైలు 5 గంటలుగా నిలిచిపోయింది.
అసలు పట్టాల పైకి బొలెరో వాహనం ఎలా వచ్చింది?: కొంతమంది గేదెలను దొంగతనం చేయడానికి వ్యూహం రచించారు. ఆ వ్యూహాన్ని అమలుపరచడానికి రాత్రి సమయం అయితే ఎవరికీ దొరకకుండా తప్పించుకోవచ్చని అనుకున్నారు. అనుకున్నట్టుగానే గేదెల దొంగతనానికి బొలెరో వాహనంలో బయలుదేరారు. వాళ్లు గేదెలను దొంగతనం చేసేలోపే వారి ఆలోచనలను పోలీసులు పసిగట్టినట్టున్నారు. పోలీసులను చూసిన దొంగలు.. వారి నుంచి తప్పించుకోవాలనుకున్నారు. బొలెరో వాహనంలో 100 కి.మీ స్పీడుతో దూసుకెళ్తున్నారు. అంతలో భీమడోలు దగ్గర రైల్వే గేటు వేసి ఉంది. ఎలాగైనా పోలీసుల నుంచి తప్పించుకోవాలని.. గేటును ఢీ కొట్టి తప్పించుకోవాలనుకున్నారు. దొంగలు రైల్వే గేటును ఢీకొట్టారు. కానీ వాహనం ఆగింది.. ఎంత స్టార్ట్ చేసినా కాలేదు. ఓ వైపు నుయ్యి, మరో వైపు గొయ్యి అన్నట్లుగా తయారయ్యింది వాళ్ల పరిస్థితి.. ఓ వైపు పోలీసులు, మరోవైపు వేగంతో దుసుకు వస్తున్న దురంతో ఎక్స్ప్రెస్.. ఏమీ చేయాలో అర్ధం కాలేదు. ఇలాంటి పరిస్థితిలో ప్రాణాలను కాపాడుకోవడానికి వాహనాన్ని అక్కడే వదిలేసి వెళ్లారు.
దురంతో ఎక్స్ప్రెస్, బొలెరో వాహనం ఢీకొట్టడంతో బొలెరో నుజ్జు నుజ్జు అయిపోయింది. రైలు ఇంజన్ మరమ్మతుకు గురి కావడంతో రైల్వే అధికారులు వేరే ఇంజిన్ ఏర్పాటు చేస్తున్నారు. ఈ ఘటనతో పలు రైళ్లు ఆలస్యంగా నడుస్తున్నాయి. అదృష్టవశాత్తు ఈ ప్రమాదంలో ఎవరికి ఎటువంటి గాయాలు కాలేదు. బొలేరో వాహనంలో ఉన్నవారు పరారీలో ఉన్నారు. పోలీసులు దుండగుల కోసం గాలింపు చేపట్టారు. రైలులోని ప్రయాణికులు చాలా మంది జాతీయ రహదారి మీదకు వచ్చి ఇతర వాహనాల్లో తమ గమ్యస్థానాలకు వెళ్లిపోయారు.
బొలెరో వాహనం ఎవరిది..? ఎక్కడి నుంచి వచ్చారు ? ఎందుకు వచ్చారు ? అని పోలీసులు దర్యాప్తు చేస్తున్నారు. ఈ విషయాలు బయటపడితే గానీ పూర్తి వివరాలు వెల్లడయ్యే అవకాశం లేదు. మొత్తానికి వాహనంలో వచ్చినవాళ్లు వెంటనే దిగిపోవడంతో పెద్ద ప్రమాదేమే తప్పిందని స్థానికులు అంటున్నారు.
ఇదీ చదవండి:
