దేశవ్యాప్తంగా ఈ వారం కొవిడ్ టీకా పంపిణీ వేగం పుంజుకున్న నేపథ్యంలో ప్రధానమంత్రి నరేంద్ర మోదీ శనివారం హర్షం వ్యక్తం చేశారు. రానున్న రోజుల్లోనూ ఇదే వేగంతో వ్యాక్సిన్ పంపిణీ జరగాలని పేర్కొన్నారు. కొవిడ్ టీకా పంపిణీ ప్రక్రియపై అధికారులతో ఆయన ఉన్నతస్థాయి సమీక్ష నిర్వహించారు. వీడియో కాన్ఫరెన్స్ ద్వారా మోదీ ఈ సమావేశంలో పాల్గొన్నారు. ఇప్పటివరకు దేశంలో పంపిణీ చేసిన టీకా డోసుల వివరాలను మోదీకి అధికారులు వివరించారు.
"గత ఆరు రోజుల్లో 3.7 కోట్ల టీకా డోసులు పంపిణీ చేశామని ప్రధానమంత్రికి అధికారులు తెలియజేశారు. ఈ సంఖ్య.. మలేసియా, కెనడా, సౌదీ అరేబియా వంటి దేశాల జనాభా కంటే అధికం."
-ప్రధానమంత్రి కార్యాలయం
కరోనా పరీక్షల విషయంలో రాష్ట్రాలతో కలిసి పనిచేయాలని అధికారులను మోదీ సూచించారు. వైరస్ను కట్టడి చేయటంలో పరీక్షలు అత్యంత ప్రధానమైన అంశమని పేర్కొన్నారు. టీకా పంపిణీ ప్రక్రియను విస్తృతం చేసేందుకు ఎన్జీఓలు, ఇతర స్వచ్ఛంద సంస్థల సహకారం తీసుకోవాలని తెలిపినట్లు ప్రధానమంత్రి కార్యాలయం వెల్లడించింది.
ప్రజలందరికీ టీకా వేయటంలో వినూత్న పద్ధతులను పాటించేందుకు తాము రాష్ట్రాలతో కలిసి పని చేస్తున్నామని అధికారులు.. మోదీకి వివరించారు. కొవిన్ పోర్టల్పై ప్రపంచ దేశాలు ఆసక్తి చూపిస్తున్నాయని అధికారులు వివరించగా.. ఇతర దేశాలకు ఈ పోర్టల్ రూపొందించటంలో భారత్ సాయం చేస్తుందని మోదీ తెలిపారు.
ఇదీ చూడండి: పసి పిల్లలకు కొవిడ్-19 టీకా అవసరం లేదా?
ఇదీ చూడండి: 'టీకా తీసుకుంటేనే ఉద్యోగులకు ఈ నెల జీతం!'
