దేశవ్యాప్తంగా సంచలనం సృష్టించిన 2008 'బాట్లా హౌస్ ఎన్కౌంటర్' కేసులో దోషిగా తేలిన అరిజ్ ఖాన్కు ఉరిశిక్ష విధించింది దిల్లీ కోర్టు. ఈ కేసును అత్యంత అరుదైనదిగా అభివర్ణించింది. ఉరిశిక్షతో పాటు మొత్తం రూ.11 లక్షల జరిమానా విధించింది. తక్షణమే ఇన్స్పెక్టర్ ఎంసీ శర్మ కుటుంబానికి రూ.10లక్షలు ఇవ్వాలని ఆదేశించారు అదనపు సెషన్స్ న్యాయమూర్తి సందీప్ యాదవ్.
2008లో జరిగిన ఈ ఘటనలో ఇన్స్పెక్టర్ మోహన్ చంద్ శర్మ(ఎంసీ శర్మ)ను అరిజ్ ఖాన్, అతని సహచరులు హత్యచేసినట్టు సాక్ష్యాధారాలతో సహా నిరూపితమైందని ఈనెల 8న తీర్పు వెలువరించింది దిల్లీ కోర్టు. అయితే.. ఏ శిక్ష విధించాలనే అంశంపై 15న విచారిస్తామని తెలిపింది. తాజాగా.. సోమవారం విచారించిన న్యాయస్థానం ఉరి శిక్షను ఖరారు చేసింది.
ఇదీ కేసు..
2008లో.. దిల్లీలో ఇండియన్ ముజాహిదీన్ సంస్థకు చెందిన ఉగ్రవాదులు ఉన్నారనే సమాచారంతో.. జామియా నగర్లోని బాట్లా హౌస్ ప్రాంతంలో దిల్లీ పోలీసులు కాల్పులు జరిపారు. పోలీసులపై ఉగ్రవాదులు ఎదురుకాల్పులకు దిగడం వల్ల.. ఇన్స్పెక్టర్ ఎంసీ శర్మ అమరుడయ్యారు. అనంతరం.. నిందితులు అక్కడి నుంచి పరారయ్యారు.
అయితే.. ఈ కేసుతో సంబంధమున్న ఉగ్రవాది షాజాద్ అహ్మద్కు.. 2013 జులైలో జీవిత ఖైదు విధించింది ట్రయల్ కోర్టు. ఆ తర్వాత.. 2018లో ప్రధాన నిందితుడు అరిజ్ఖాన్ను అరెస్ట్ చేశారు దిల్లీ పోలీసులు.
