గణతంత్ర దినోత్సవం రోజున దేశ రాజధాని దిల్లీలో చెలరేగిన హింసాత్మక ఘటనల కేసులో ఆరోపణలు ఎదుర్కొంటున్న పంజాబ్ నటుడు దీప్ సిద్ధూను దిల్లీ ప్రత్యేక విభాగం పోలీసులు అరెస్ట్ చేశారు. చండీగఢ్, అంబాలా మధ్యలోని జిరాక్‌పుర్‌ ప్రాంతంలో సిద్ధూను అరెస్టు చేసినట్లు తెలిపారు.
కాలిఫోర్నియాలో నివసిస్తోన్న తన స్నేహితురాలు, నటితో దీప్ సిద్ధూ కాంటాక్ట్లో ఉన్నట్లు పోలీసులు గుర్తించారు. సిద్ధూ వీడియోలు చేస్తూ ఆమెకు పంపిస్తుండగా.. వాటిని సదరు నటి తన ఫేస్బుక్ పేజీలో అప్లోడ్ చేస్తున్నట్లు పోలీసు వర్గాలు తెలిపాయి.
రిపబ్లిక్ డే రోజు.. రైతుల ట్రాక్టర్ పరేడ్ సందర్భంగా ఎర్రకోట వద్ద హింసాత్మక ఘటనలు చెలరేగాయి. ఆ ఘటనలపై స్థానిక పోలీసులు, ప్రత్యేక విభాగం, క్రైమ్ విభాగం పోలీసులు మూడు స్థాయుల్లో దర్యాప్తు చేపట్టారు. పంజాబ్ నటుడు దీప్ సిద్ధూ, గ్యాంగ్స్టర్ లఖా సిధానాల పేర్లను ఎఫ్ఐఆర్లో చేర్చారు. సిద్ధూ ఈ ఘటనలో పాల్గొన్నట్లు వెల్లడించారు.
ఇదీ చూడండి: 'నేను విచారణకు హాజరవుతా.. కానీ'
