Dead man vaccinated: కరోనా వ్యాక్సిన్ తొలి డోసు కూడా తీసుకోని వ్యక్తికి రెండు డోసులు పూర్తయినట్లు మొబైల్కు సందేశాలు వచ్చిన సంఘటనలు కొద్ది రోజుల కింద వెలుగు చూశాయి. అలాంటి ఓ అరుదైన సంఘటనే మధ్యప్రదేశ్ రాజ్గఢ్ జిల్లాలో జరిగింది.
ఇదీ జరిగింది..
జిల్లాలోని బియోరా ప్రాంతానికి చెందిన పురుశోత్తం శక్యవార్(78) అనే వృద్ధుడు ఈ ఏడాది మే నెలలో మరణించారు. ఆయన పేరుపై ఉన్న మొబైల్కు కొవిన్ నుంచి డిసెంబర్ 3వ తేదీన వ్యాక్సిన్ రెండో డోసు తీసుకున్నట్లు, వ్యాక్సిన్ సర్టిఫికెట్ డౌన్లోడ్ చేసుకోవాలని సందేశం అందింది.
"డిసెంబర్ 3వ తేదీన మొబైల్కు మెసేజ్ వచ్చింది. వ్యాక్సిన్ సర్టిఫికెట్ను సైతం డౌన్లోడ్ చేశాం. మా తండ్రి గత ఏప్రిల్ 8న వ్యాక్సిన్ తొలి డోసు తీసుకున్నారు. ఇందోర్లో చికిత్స పొందుతూ మే 24న మరణించారు. "
- ఫూల్ సింగ్ శక్యవార్, వృద్ధుడి కుమారుడు.
ఈ అంశంపై జిల్లా టీకా పంపిణీ అధికారి డాక్టర్ పీఎల్ భగోరియాను అడగగా.. ఈ విషయంపై తమకు సమాచారం అందినట్లు చెప్పారు. ఈ అంశంపై దర్యాప్తు చేపట్టినట్లు తెలిపారు. కంప్యూటర్లో తలెత్తిన లోపంతో అలాంటి మెసేజ్ వెళ్లి ఉండొచ్చని పేర్కొన్నారు. మరోవైపు.. టీకా పంపిణీ ప్రారంభమైనప్పటి నుంచి చాలా మంది ఫోన్ నంబర్లను తప్పుగా నమోదు చేస్తున్నారని, అది కూడా ఓ కారణం కావొచ్చని తెలిపారు బయోరా బ్లాక్ మెడికల్ అధికారి. తప్పు ఎక్కడ జరిగిందనేది త్వరలోనే గుర్తిస్తామన్నారు.
కాంగ్రెస్ విమర్శలు..
వ్యాక్సిన్ సందేశంపై కాంగ్రెస్ ఎమ్మెల్యే రామచంద్ర డాంగి విమర్శలు గుప్పించారు. వ్యాక్సినేషన్పై తప్పుడు సమాచారాన్ని ఇస్తూ ప్రజలను ప్రభుత్వం తప్పుదోవ పట్టిస్తోందని ఆరోపించారు. గతంలోనూ ఇలాంటి సంఘటనలు జరిగాయని, అలాంటి కేసులపై ఉన్నతస్థాయి దర్యాప్తు జరగాలని డిమాండ్ చేశారు.
ఇదీ చూడండి:
రెండో డోసు తీసుకుంటే.. మద్యం సీసాలపై 10శాతం డిస్కౌంట్
