ఉత్తర్ప్రదేశ్ గంగానదిలో మూడు రోజులుగా మృతదేహాలు కొట్టుకొస్తున్నాయి. గాజీపుర్ జిల్లా గాహ్మర్ ప్రాంతంలోని పంచముఖి ఘాట్లో బధవారం మరో మూడు నుంచి నాలుగు మృతదేహాలు బయటపడ్డాయి. దీంతో అక్కడి స్థానికుల్లో భయాందోళనలు వ్యక్తమయ్యాయి.
ఈ ఘటనపై గాజీపుర్ జిల్లా మేజిస్ట్రేట్ మంగళ ప్రసాద్ను 'ఈటీవీ భారత్' సంప్రదించింది. అయితే.. ఒక్క మృతదేహాన్ని మాత్రమే తాము స్వాధీనం చేసుకున్నామని ఆయన చెప్పారు. కానీ, జిల్లా అధికారులు, స్థానిక అధికారులు కలిసి రాత్రి 11 గంటల నుంచి ఉదయం 8 గంటల వరకు ఎన్నో మృతదేహాలను బయటకు తీశారని ప్రత్యక్ష సాక్షులు చెప్పారు. ఇప్పటివరకు దాదాపు 70 నుంచి 80 మృతదేహాలను గంగా నది నుంచి అధికారులు బయటకు తీశారన్నారు.
ఈ మృతేదేహాల విషయాన్ని తాము తీవ్రంగా పరిగణిస్తున్నామని ఎస్డీఎం రమేష్ కుమార్ తెలిపారు. మృతదేహాలను స్వాధీనం చేసుకునేందుకు, అంత్యక్రియలు చేసేందుకు ఓ ప్రత్యేక బృందాన్ని ఏర్పాటు చేసినట్లు చెప్పారు.
బలియా జిల్లాలో...
మరోవైపు బలియా జిల్లాలో మరో 7 మృతదేహాలు గంగా నదిలో తేలియాడుతూ కనిపించాయి. ఈ మృతదేహాలతో కలిపి ఇప్పటివరకు బలియా జిల్లావ్యాప్తంగా గంగా నదిలో కనిపించిన మృతదేహాల సంఖ్య 52కు చేరిందని ఓ అధికారి తెలిపారు. ఉజియార్, కుల్హాదియా, భారౌలీ ఘాట్ల వద్ద మంగళవారం సాయంత్రం.. 45 మృతదేహాలు కనిపించాయని బలియా స్థానికులు తెలిపారు.
బలియా-బక్సార్ వంతెన కింద కొన్ని మృతదేహాలు కుళ్లినస్థితిలో కనిపించాయని బలియా జిల్లా మేజిస్ట్రేట్ అదితీ సింగ్ తెలిపారు. ఈ విషయంపై అధికారులు దర్యాప్తు చేపట్టారని చెప్పారు. లభ్యమైన మృతదేహాలకు అంత్యక్రియలు నిర్వహిస్తున్నామని పేర్కొన్నారు.
ఇదీ చూడండి: ఒకే కారుతో మూడు రాష్ట్రాల్లో బీభత్సం- చివరకు...
