తూర్పు మధ్య బంగాళాఖాతంలో ఏర్పడిన యాస్ తుపాను తీరంవైపు ముంచుకొస్తోంది. మరో 24 గంటల్లో అతి తీవ్ర తుపానుగా మారనుందని భారత వాతావరణ శాఖ తెలిపింది. ప్రస్తుతం పోర్ట్ బ్లెయిర్కి 600 కిలోమీటర్ల దూరంలో కదులుతున్నట్లు తెలిపింది. మే 26న మధ్యాహ్నం ఉత్తర ఒడిశా-బంగాల్ తీరంలోని పరదీప్, సాగర్ ద్వీపాల మధ్య తుపాను తీరం దాటనుంది. ఈ సమయంలో గంటకు 155-180 కిలోమీటర్ల వేగంతో గాలులు వీస్తాయని ఐఎండీ తెలిపింది.
అతి తీవ్ర తుపానుగా మారునుందన్న ఐఎండీ హెచ్చరికలతో అందుకు తగిన విధంగా సన్నద్ధమవుతున్నాయి ప్రభావిత రాష్ట్రాలు.
ఒడిశాలో..
బంగాల్ సరిహద్దు ప్రాంతమైన బాలాసోర్ జిల్లాలో తుపాను తీరం తాకనుందన్న అంచనాలతో ఏర్పాట్లు చేపట్టింది ఒడిశా ప్రభుత్వం. భారీగా సహాయక బృందాలను తరలిస్తోంది. లోతట్టు ప్రాంతాలు, తుపాను ప్రభావిత ప్రాంతాల నుంచి ప్రజలను భారీగా సురక్షితం ప్రాంతాలకు తరలిస్తున్నట్లు తెలిపారు ఎస్ఆర్సీ పీకే జేనా. తుపాను కారణంగా ఒక్కరు కూడా మరణించకూడదనే లక్ష్యంతో ప్రభుత్వం పని చేస్తున్నట్లు వివరించారు.
రాష్ట్రంలో బాలాసోర్, భద్రక్, కేంద్రపారా, జగస్టింఘ్పుర్ జిల్లాలపై అధిక ప్రభావం ఉంటుందని, మాయార్భంజ్, కియోంఝర్ జిల్లాలపై పాక్షికంగా ఉండనుందని అధికారులు అంచనా వేస్తున్నారు. ఇప్పటికే 22 ఎన్డీఆర్ఎఫ్, 50 ఓడీఆర్ఏఎఫ్ (800 మంది సిబ్బంది) బృందాలు, 150 మంది అగ్నిమాపక సిబ్బంది, చెట్లు తొలగించేందుకు 35 బృందాలను మోహిరించారు. మరో 30 ఎన్డీఆర్ఎఫ్ బృందాలు పంపాలను కోరారు. బాలాసోర్ జిల్లాలో 140 తుపాను శిబిరాలతో పాటు 1102 ఇతర తాత్కాలిక కేంద్రాలను ఏర్పాటు చేశారు.
బంగాల్లో..
బంగాల్పై యాస్ తుపాను తీవ్ర ప్రభావం చూపనున్న నేపథ్యంలో అందుకు తగిన విధంగా ఏర్పాట్లు చేస్తోంది అక్కడి ప్రభుత్వం. ఈ క్రమంలో మే 25 మంగళవారం నుంచి కోల్కతా పోర్టును మూసివేస్తున్నట్లు అధికారులు తెలిపారు. మంగళవారం ఉదయం నుంచి నౌకల రాకను నిలిపేస్తున్నట్లు చెప్పారు. కార్మికులను ఇతర ప్రాంతాలకు తరలిస్తామని పోర్ట్ ట్రస్ట్ ఛైర్మన్ వినిత్ కుమార్ తెలిపారు. సాయంత్రం 6 గంటల నుంచి వస్తు రవాణా వాహనాలనూ నిలిపివేస్తామన్నారు. కోల్కతా డాక్ సిస్టమ్, హల్దియా డాక్ కాంప్లెక్స్లో కంట్రోల్ రూంలు ఏర్పాటు చేశామన్నారు. అత్యవసర పరిస్థితుల కోసం టగ్బోట్లు, లాంచీలను అందుబాటులో ఉంచినట్లు తెలిపారు.
ఎన్డీఆర్ఎఫ్..
ఒడిశా, బంగాల్లోని ఆక్సిజన్ ఉత్పత్తి కేంద్రాలపై తుపాను ప్రభావం లేకుండా చూడాలని సహాయక బృందాలకు సూచించింది ఎన్డీఆర్ఎఫ్. 149 టీంలు సహాయక చర్యలు, ప్రజల తరలింపులో పాల్గొంటుండగా, 99 బృందాలను క్షేత్రస్థాయిలో మోహరించామని ఎన్డీఆర్ఎఫ్ డీజీ తెలిపారు. మరో 50 బృందాలు సిద్ధంగా ఉన్నాయన్నారు.
ఇదీ చూడండి: యాస్ తుపాను: రంగంలోకి హెలికాప్టర్లు, విమానాలు
