నూతన సాగు చట్టాలకు వ్యతిరేకంగా దేశ రాజధాని సరిహద్దుల్లో పంజాబ్ రైతులు పెద్ద ఎత్తున ఆందోళన సాగిస్తున్న వేళ.. ఆ రాష్ట్రంలో భాజపాకు గట్టి షాక్‌ తగిలింది. అక్కడి పురపాలక ఎన్నికల్లో కమలదళం ఓటమి చవిచూసింది. మొత్తం 8 మున్సిపల్ కార్పొరేషన్లలో 7 చోట్ల కాంగ్రెస్ నెగ్గింది. మరోచోట ఫలితం గురువారం వెలువడనుంది. అయితే ఈ ఫలితాల్లో భాజపా రెండో స్థానంలోనూ నిలవలేకపోయింది. శిరోమణి అకాలీదళ్ కాస్త ప్రభావం చూపింది.
మోగా, హోశియార్పుర్, కపూర్థలా, అబోహర్, బటాలా, పఠాన్కోట్, బఠిండా కార్పొరేషన్లలో అధికార పార్టీ జయకేతనం ఎగురవేసింది. 116 నగర పంచాయతీల్లోనూ అధిక స్థానాల్లో గెలుపొంది తన పట్టు నిరూపించుకుంది కాంగ్రెస్.
53 ఏళ్లకు..
బఠిండా మున్సిపల్ కార్పొరేషన్‌లో కాంగ్రెస్ పార్టీ చరిత్ర సృష్టించింది. 53ఏళ్లలో తొలిసారిగా ఇక్కడ మేయర్‌ పదవిని దక్కించుకుంది. తాజాగా జరిగిన ఎన్నికల్లో ఈ కార్పొరేషన్‌లో కాంగ్రెస్‌కు 43 స్థానాలు రాగా.. శిరోమణి అకాలీదళ్ 7 చోట్ల గెలుపొందింది. దీంతో మేయర్‌ పదవి హస్తం పార్టీ కైవసం చేసుకుంది. రాష్ట్ర మంత్రి మన్‌ప్రీత్‌ సింగ్‌ బాదల్‌ ఈ విషయాన్ని ట్విట్టర్‌లో పోస్ట్‌ చేస్తూ ఫొటోలు పంచుకున్నారు.
మొహలీలో గురువారం...
రాష్ట్రంలోని మొత్తం 8 మున్సిపల్ కార్పొరేషన్లు, నగర పంచాయతీల్లోని 2,302 వార్డులకు ఫిబ్రవరి 14న ఎన్నికలు జరిగాయి. బుధవారం ఉదయం 9 గంటల నుంచి ఓట్ల లెక్కింపు చేపట్టారు. మొహలీలోని రెండు పోలింగ్ కేంద్రాల్లో మళ్లీ ఓటింగ్ నిర్వహించాలని రాష్ట్ర ఎన్నికల సంఘం ఆదేశించిన నేపథ్యంలో.. ఆ కార్పొరేషన్ పరిధిలో ఓట్ల లెక్కింపు గురువారం జరగనుంది. బుధవారం అక్కడ రీపోలింగ్ జరిగింది.
రైతు చట్టాలను నిరసిస్తూ ఎన్డీఏ నుంచి అకాలీదల్ వైదొలగటం వల్ల ఈసారి భాజపా, ఎస్ఏడీ విడివిడిగా పోటీ చేశాయి.
ఇదీ చదవండి : 'కరోనాపై అతి విశ్వాసంతో కేంద్రం'
