Compititive Coaching for Rs.2: బిహార్ పబ్లిక్ సర్వీస్ కమిషన్ పరీక్షలకు సన్నద్ధమవుతున్న విద్యార్థులకు అదిరిపోయే ఆఫర్ ఇచ్చింది పట్నాలోని ఓ కోచింగ్ సంస్థ. పరీక్షలు దగ్గరపడుతున్న నేపథ్యంలో రూ.2కే రివిజన్ తరగతులను అందుబాటులోకి తీసుకువచ్చింది. మే 8న బీపీఎస్సీ ప్రీలిమినరీ పరీక్షలు జరగనున్నాయి. ఈ క్రమంలో ఆఫీసర్స్ అకాడమీ కోచింగ్ ఇన్స్టిట్యూట్ డైరెక్టర్ సౌరభ్ శర్మ రూ.2కే తరగతులను నిర్వహించాలని నిర్ణయించారు.
ఆసక్తి గల అభ్యర్థులు ప్లే స్టోర్ నుంచి ఇన్స్టిట్యూట్ యాప్ డౌన్లోడ్ చేసుకుని లేదా వెబ్సైట్లో పేరు నమోదు చేసుకుని ఆన్లైన్లో తరగతులు వినవచ్చు. ఇప్పటివరకు 4,000 మంది విద్యార్థులు నమోదు చేసుకున్నారు. ఇదికాకుండా 'వైభవ్ 30' పేరుతో ఓ కోర్సును ప్రారంభించనున్నట్లు సౌరభ్ శర్మ తెలిపారు. ఆర్థికంగా బలహీన వర్గాల నుంచి వచ్చిన మెరిట్ విద్యార్థులకు ఈ అవకాశం ఇవ్వనున్నట్లు పేర్కొన్నారు. అయితే.. ఈ విద్యార్థులు ఇన్స్టిట్యూట్ నిర్దేశించిన ఓ పరీక్షలో ఉత్తీర్ణులు కావాల్సి ఉంటుందని వెల్లడించారు.
ఇదీ చదవండి: 18+ వారందరికీ కరోనా టీకా బూస్టర్ డోస్- ఆదివారం నుంచే...
