నవరాత్రి వేడుకలంటే ముందుగా గుర్తొచ్చేది బంగాల్ రాష్ట్రం. తొమ్మిది రోజుల పాటు ఉత్సవాలు అంగరంగ వైభవంగా సాగుతుంటాయి. ఇందుకోసం మండపాలను అద్భుతంగా తీర్చిదిద్దుతుంటారు. వేడుకలకు డమ్డమ్ ప్రాంతం పెట్టింది పేరు. ఇక్కడి కమ్యూనిటీ క్లబ్లో ఏటా ఉత్సవాలు ఘనంగా నిర్వహిస్తారు. ప్రస్తుతం దేశవ్యాప్తంగా రైతుల ఆందోళనలు చర్చనీయాంశమయ్యాయి. ఈ నేపథ్యంలో డమ్డమ్ పార్కులోని కమ్యూనిటీ క్లబ్లో రైతుల ఉద్యమాన్ని థీమ్గా ఏర్పాటు చేశారు. 'మా ధాన్యాన్ని వదులుకోము.. మా ఆత్మ గౌరవాన్ని విడిచిపెట్టము,' అన్న నినాదంతో కమ్యూనిటీ క్లబ్ను తీర్చిదిద్దారు. ఉత్తర్ప్రదేశ్ లఖింపుర్ హింసాత్మక ఘటన అంశం కూడా థీమ్లో దర్శనమిచ్చింది.
అనిర్బాన్ అనే కళాకారుడి ఐడియాతో ఈ థీమ్ పుట్టుకొచ్చింది. డమ్డమ్ భారత్ చక్ర నిర్వాహకులుగా వ్యవహరిస్తున్నారు. ఎన్నో వినూత్న థీమ్లతో గత కొంతకాలంగా కమ్యూనిటీ క్లబ్ అందరినీ అకట్టుకుంటోంది.
ఈ క్రమంలోనే ఈ ఏడాది రైతుల ఆందోళనలపై థీమ్ను ఏర్పాటు చేసింది. సాగు చట్టాలకు వ్యతిరేకంగా ఏడాదిగా నిరసనలు జరుగుతున్నాయి. లఖింపుర్ హింసాత్మక ఘటనతో ఉద్రిక్తతలు తారస్థాయికి చేరాయి. గత ఆదివారం.. సాగు చట్టాలకు వ్యతిరేకంగా నిరసనలు చేస్తున్న అన్నదాతల మీదకు ఓ కారు దూసుకెళ్లింది. ఈ ఘటనలో నలుగురు రైతులు ప్రాణాలు కోల్పోయారు. అనంతరం చెలరేగిన ఘర్షణలో మరో నలుగురు మృతిచెందారు. ఈ ఘటన దేశవ్యాప్తంగా సంచలనం సృష్టించింది. రైతులపైకి దూసుకెళ్లిన కారులో.. కేంద్ర హోంశాఖ సహాయమంత్రి అజయ్ మిశ్రా కుమారుడు ఉన్నట్టు ఆరోపణలున్నాయి.
అయితే తాము ఏర్పాటు చేసిన థీమ్కు.. రాజకీయాలకు ఎలాంటి సంబంధాలు లేవని నిర్వాహకులు స్పష్టం చేశారు.
"ఏ ఏడాది ఎంచుకున్న థీమ్కు రాజకీయాలతో సంబంధం లేదు. కేవలం మానవత్వం కోణంలోనే దీనిని ఏర్పాటు చేశాము."
-- నిర్వాహకులు.
రైతుల కష్టాలకు చిహ్నంగా.. పగిలిన వారి కాలి పాదాలను ప్రతిబింబించే విధంగా ప్రతిమను ఏర్పాటు చేశారు. ట్రాక్టర్లను కూడా పెట్టారు. అన్నదాతలకు మద్దతుగా పూజా మండపాల్లోని గోడలపై నినాదాలు రాశారు.
ఇవీ చూడండి:-
