పిల్లలకు విషమిచ్చి ఉరి వేసుకున్న భార్యాభర్తలు.. లాడ్జిలో మృతదేహాలు

ఛత్తీస్​గఢ్​లో ఓ కుటుంబం లాడ్జికి వెళ్లి బలవన్మరణానికి పాల్పడింది. భార్యాభర్తలు మొదట తమ పిల్లలకు విషమిచ్చారు. అనంతరం వారు కూడా ఉరి వేసుకుని ఆత్మహత్యకు పాల్పడ్డారు.

Family suicide: ఛత్తీస్​గఢ్​ కాంకేర్​ జిల్లాలో విషాధ ఘటన జరిగింది. భార్యాభర్తలు తమ ఇద్దరు పిల్లలకు విషమిచ్చి అనంతరం తాము కూడా ఉరి వేసుకుని ఆత్మహత్య చేసుకున్నారు. బస్తర్​ లాడ్జికి వెళ్లి బలవన్మరణానికి పాల్పడ్డారు. ఒకే కుటుంబానికి చెందిన నలుగురి మృతదేహాలను పోలీసులు స్వాధీనం చేసుకున్నారు. భార్యాభర్తల ఉరి కొయ్యకు విగతజీవులుగా వేలాడగా.. పిల్లల మృతదేహాలు బెడ్​పై ఉన్నట్లు తెలిపారు. మొదట పిల్లలకు విషమిచ్చి, వారు చనిపోయిన తర్వాతే తల్లిదండ్రులు ఉరివేసుకున్నట్లు పోలీసులు అనుమానిస్తున్నారు. పిల్లల చేతులు కట్టేసి ఉన్నాయని, వారి నోట్లో నుంచి నురగ వచ్చినట్లు పేర్కొన్నారు. ప్రస్తుతానికి ఆత్మహత్యలుగానే భావిస్తున్నామని చెప్పారు. బుధవారం రాత్రి 8:30 గంటలకు ఈ కుటుంబం లాడ్జికి వెళ్లిందని, గురువారం రాత్రి 10 గంటల వరకు తలుపులు తీయకపోవడం వల్ల పోలీసులకు సమాచారం అందిందని వివరించారు. వీరు రాయ్​పుర్​కు చెందిన వారని గుర్తింనట్లు వెల్లడించారు.

Loud speaker death: గుజరాత్ మెహ్సానాలో 40 ఏళ్ల వ్యక్తిని కొందరు కొట్టి చంపారు. అతను ఆలయంలో లౌడ్ స్పీకర్లు మోగించాడని ఈ క్రూర చర్యకు పాల్పడ్డారు. ఈ ఘటనకు సంబంధించి ఆరుగురిని అరెస్టు చేసినట్లు పోలీసులు తెలిపారు.

ఝార్ఖండ్ గుమ్లాలో 45 ఏళ్ల షమీమ్​ అన్సారీని ఓ సమూహం కర్రలతో దారుణంగా కొట్టి చంపింది. రాయ్​కేరా ఫారెస్ట్​ కమిటీ అధ్యక్షునిగా ఉన్న అతను.. శుక్రవారం ఉదయం 10:30గం.లకు కొందరు అడవిలో అక్రమంగా చెట్లు నరుకుతుండటాన్ని చూసి పోలీసులకు సమాచారం అందించాడు. ఆ తర్వాత కాసేపటికే అతన్ని గ్రామస్తులు కొట్టి చంపినట్లు అటవీ అధికారులు వెల్లడించారు.

British woman molested: మహారాష్ట్ర బాంద్రాలోని ఓ క్లబ్​లో 44 ఏళ్ల బ్రిటిష్ మహిళను ఓ వ్యక్తి లైంగికంగా వేధించాడు. ఆమె భర్త ఉండగానే అసభ్యంగా ప్రవర్తించాడు. నిందితుడిని అరెస్టు చేసినట్లు ముంబయి పోలీసులు శుక్రవారం తెలిపారు. బాధిత మహిళ, ఆమె భర్త బ్రిటిష్​ డిప్యూటీ హై కమిషన్​లోనే పనిచేస్తున్నట్లు వెల్లడించారు. మంగళవారం రాత్రి భార్యాభర్తలు క్లబ్​కు వెళ్లినప్పుడు ఈ ఘటన జరిగినట్లు వివరించారు.

ఇదీ చదవండి: పెళ్లికి వెళ్తుండగా ప్రమాదం.. ఆరుగురు దుర్మరణం