దివంగత బాలీవుడ్ నటుడు సుశాంత్ సింగ్ రాజ్పుత్పై సినిమా పేరిట ఓ హోటల్ యజమానికి టోకరా కొట్టారు కొందరు వ్యక్తులు. దేశ రాజధాని దిల్లీ సమీపంలోని నోయిడాలో ఈ ఘటన జరిగింది. రూ.8లక్షలు మోసపోయానంటూ బాధితుడు కోర్టును ఆశ్రయించగా.. న్యాయస్థానం ఆదేశాల మేరకు నిందితులపై కేసు నమోదైంది.
ఇదీ జరిగింది: నిందితులు విజయ్ శేఖర్, నితిన్ పంత్, సచిన్ తివారీ, వరుణ్ ఖండేల్వాల్.. నోయిడా థానా సెక్టార్-39లోని ఓ హోటల్లో నాలుగు గదులు బుక్ చేసుకున్నారు. హోటల్ నిర్వాహకులతో.. తమను తాము డైరెక్టర్లుగా పరిచయం చేసుకున్నారు. సుశాంత్ సింగ్ రాజ్పుత్పై సినిమా తీస్తామంటూ చెప్పుకున్నారు. సుశాంత్ పాత్రను తాను పోషించనున్నట్లు సచిన్ తివారీ.. హోటల్ యజమానికి చెప్పాడు.
2020లో వారు హోటల్కు వచ్చారని.. నాటి నుంచి ఏడాది పాటు అద్దె కట్టకుండానే విడిది చేశారని బాధితుడు ఆరోపించాడు. చివరకు వారి ఇచ్చిన చెక్ కూడా బౌన్స్ అయ్యిందని కోర్టును ఆశ్రయించాడు. దీంతో నిందితులపై కేసు నమోదు చేసిన పోలీసులు.. దర్యాప్తు ముమ్మరం చేశారు.
ఇదీ చూడండి: మన జాతీయ గీతానికి మ్యూజిక్ డైరెక్టర్ ఎవరో తెలుసా?
