Chandrayaan 3 launch date : జాబిల్లిపై అన్వేషణకు చంద్రయాన్ 3 ప్రయోగాన్ని ఈ నెల 13న చేపట్టనున్నట్లు భారత అంతరిక్ష పరిశోధన సంస్థ (ఇస్రో) ప్రకటించింది. ఈ సారి చంద్రుడిపై ల్యాండర్ను కచ్చితంగా దించుతామనే విశ్వాసం ఉన్నట్లు ఇస్రో ఛైర్మన్ ఎస్ సోమ్నాథ్ తెలిపారు. జూలై 13 నుంచి 19 వరకు లాంఛ్ విండో అందుబాటులో ఉందన్న సోమ్నాథ్.. తొలి రోజే ప్రయోగం చేపడతామని వివరించారు. GSLV M-3 వాహకనౌక ద్వారా ప్రయోగం చేపట్టనున్నట్లు వెల్లడించారు. ల్యాండర్తో పాటు రోవర్తో దీన్ని ప్రయోగించనున్నారు. చంద్రయాన్ 2లో ఆర్బిటర్ జాబిల్లి కక్ష్యలో తిరుగుతుండగా దాన్నే చంద్రయాన్ 3కి వినియోగించుకోనున్నారు.
"చంద్రయాన్ 3 వాహకనౌక పూర్తిగా సిద్ధమైంది. దానిని పూర్తిగా పరీక్షించి కంపార్ట్మెంట్లో జత చేశాం. ప్రయోగానికి జులై 12 నుంచి 19 వరకు అనుకూలంగా ఉంది. వీలైనంత త్వరగా ప్రయోగం చేయడానికి సిద్ధంగా ఉన్నాం. అది 12,13, 14.. ఏ తేదీ అయినా కావచ్చు."
-ఎస్ సోమ్నాథ్, ఇస్రో ఛైర్మన్
Chandrayaan 3 launch time : చంద్రయాన్-2కు కొనసాగింపు మిషన్గా చంద్రయాన్-3ను చేపట్టింది ఇస్రో. చంద్రుడిపై సురక్షితంగా ల్యాండ్ అవ్వడం, ఉపరితలంపై తిరగడం వంటివి ఈ ప్రయోగంలో లక్ష్యాలుగా పెట్టుకుంది. చంద్రయాన్-3లో స్పెక్ట్రో-పోలారిమెట్రి అనే పరికరాన్ని పంపించనున్నట్లు అధికారులు తెలిపారు. భూమిపై పడే కాంతి ధ్రువణాన్ని చంద్రుడి కక్ష్యలో నుంచి కొలిచేందుకు ఈ పరికరం ఉపయోగపడుతుందని చెప్పారు.
ఏం పంపిస్తారంటే?
చంద్రయాన్-3 ప్రయోగంలో భాగంగా ఓ రోవర్, ల్యాండర్ను జాబిల్లిపైకి పంపించనున్నారు. రాకెట్లోని ప్రొపల్షన్ మాడ్యూల్.. ల్యాండర్, రోవర్లను చంద్రుడి కక్ష్యకు 100 కిలోమీటర్ల దూరం వరకు తీసుకెళ్తుంది. చంద్రుడిపైకి రోవర్ను దించేందుకు ల్యాండర్ సహకరిస్తుంది. ల్యాండింగ్ తర్వాత చంద్రుడిపై తిరుగుతూ కీలక సమాచారాన్ని రోవర్.. భూమికి చేరవేస్తుంది.
జూన్ 12 నుంచి 19 మధ్యలో ఈ ప్రయోగం చేపడితే తక్కువ ఇంధన ఖర్చుతోనే చంద్రుడిని చేరుకునే అవకాశం ఉంటుందని చెప్పారు ఇస్రో ఛైర్మన్ సోమ్నాథ్. చంద్రయాన్ ప్రయోగంలో ఎలాంటి ఇబ్బంది లేకుండా చూసేందుకు వ్యోమనౌకలో చాలా మార్పులు చేసినట్లు సోమనాథ్ వెల్లడించారు. సౌరశక్తిని అధికంగా ఒడిసిపట్టేలా పెద్ద సోలార్ ప్యానెళ్లను అమర్చినట్లు వివరించారు. ప్రయోగ సమయంలో తలెత్తే సమస్యల నివారణకు హార్డ్వేర్, కంప్యూటర్ సాఫ్ట్వేర్ సెన్సార్లలో కీలక మార్పులు చేసినట్లు చెప్పారు. రాకెట్ ఇంధన సామర్థ్యాన్ని సైతం పెంచినట్లు పేర్కొన్నారు. ల్యాండర్ కాళ్లను బలోపేతం చేసినట్లు వివరించారు. రాకెట్కు అమర్చిన సోలార్ ప్యానెళ్లు ఎక్కువ శక్తిని ఉత్పత్తి చేసేందుకు సహకరిస్తాయన్నారు.
చంద్రయాన్-2 ఏమైందంటే?
అంతకుముందు 2019లో చంద్రయాన్-2 ప్రయోగం చేపట్టింది ఇస్రో. జులై 22న రాకెట్ను లాంఛ్ చేయగా.. ఆగస్టు 20న చంద్రుడి కక్ష్యలోకి అది ప్రవేశించింది. అయితే ఆఖరి నిమిషంలో ప్రయోగం అనూహ్య మలుపులు తిరిగింది. ప్రయోగంలో భాగంగా ల్యాండర్.. చంద్రుడిపై దిగాల్సి ఉండగా.. క్రాష్ అయింది. జాబిల్లి ఉపరితలానికి 2.1 కిలోమీటర్ల దూరంలో ఉండగా.. ఇస్రోతో ల్యాండర్కు సంబంధాలు తెగిపోయాయి. సాఫ్ట్వేర్లో సమస్య వల్ల క్రాష్ ల్యాండ్ అయినట్లు ఇస్రో తన ఫెయిల్యూర్ అనాలసిస్ నివేదికలో వివరించింది. అయితే, ప్రయోగంలో భాగంగా పంపించిన ఆర్బిటార్ మాత్రం చక్కగా పనిచేస్తోంది. ఇప్పటికే చంద్రుడి చుట్టూ వేల ప్రదక్షిణలు చేసింది.
ఇవీ చదవండి : చంద్రయాన్-3 ప్రయోగానికి ముహూర్తం ఫిక్స్.. మరో 15రోజుల్లో లాంఛ్
జూన్‌లో జాబిల్లిపైకి ఇస్రో చంద్రయాన్-3.. 2024 చివర్లో గగన్‌యాన్‌
