కరోనా మహమ్మారి వల్ల వాయిదా పడిన సెంట్రల్ టీచింగ్ ఎలిజిబిలిటీ టెస్ట్(సీ-టెట్)ను వచ్చే ఏడాది జనవరిలో నిర్వహించనున్నట్లు కేంద్ర విద్యాశాఖ మంత్రి రమేశ్ పొఖ్రియాల్ వెల్లడించారు.
112 నగరాల్లో ఈ ఏడాది జులై 5న జరగాల్సిన 14వ ఎడిషన్ సీ-టెట్ పరీక్షకు.. కరోనా కారణంగా పర్యవేక్షణ సంబంధించి కొన్ని సమస్యలు తలెత్తాయి. దీంతో పరీక్షను వాయిదా వేశారు అధికారులు. అయితే కరోనా నిబంధనలకు అనుగుణంగా 135 కేంద్రాల్లో వచ్చే ఏడాది జనవరి 31న పరీక్ష నిర్వహించనున్నట్లు పొఖ్రియాల్ స్పష్టం చేశారు.
అభ్యర్థుల నుంచి భారీ సంఖ్యలో వచ్చిన అభ్యర్థనల మేరకు పరీక్షా కేంద్రాలను మార్చుకునే అవకాశం వారికి కల్పించినట్లు సెంట్రల్ బోర్డ్ ఆఫ్ సెకండరీ ఎడుకేషన్ (సీబీఎస్సీ) తెలిపింది. వైరస్ వ్యాప్తి కొనసాగుతున్న నేపథ్యంలో అభ్యర్థుల సమస్యలను దృష్టిలో ఉంచుకొని ఈ నిర్ణయం తీసుకున్నట్లు అధికారులు తెలిపారు.
'అభ్యర్థులు ఎంపిక చేసుకున్న నాలుగు నగరాల్లో పరీక్షా కేంద్రాలను కేటాయించడానికి ప్రయత్నిస్తాం. ఏదైనా పరిస్థితుల తలెత్తినట్లయితే వారు ఎంచుకున్న నగరంలో కాకుండా వేరే నగరాల్లో కూడా పరీక్షా కేంద్రాలను కేటాయించవచ్చ'ని ఓ సీనియర్ అధికారి వెల్లడించారు.
ఇదీ చూడండి: మోదీ మెచ్చిన మాస్క్లు తయారు చేసిందెవరు?
