Manish Sisodia CBI : దిల్లీ మద్యం కుంభకోణం కేసులో ఆ రాష్ట్ర ఉప ముఖ్యమంత్రి మనీశ్ సిసోదియాకు సీబీఐ సమన్లు జారీ చేసింది. సోమవారం ఉదయం 11 గంటలకు సీబీఐ ప్రధాన కార్యాలయానికి విచారణ కోసం రావాలని కోరింది. ఈ కేసులో ఇప్పటికే సీబీఐ.. దేశంలోని అనేక ప్రదేశాల్లో సోదాలు జరిపి విజయ్ నాయర్, తెలంగాణకు చెందిన అభిషేక్ బోయినపల్లిని అరెస్ట్ చేసింది. ఉభయ తెలుగు రాష్ట్రాలకు సంబంధించిన పలువురు రాజకీయ నాయకుల బంధువులు, అనుచరులను సీబీఐ విచారించింది. మనీశ్ సిసోదియా నివాసంపై రెండుసార్లు సోదాలు జరిపిన సీబీఐ.. పలు కీలక డాక్యుమెంట్లను స్వాధీనం చేసుకుంది.
నేను రెడీ..
'నా ఇంట్లో 14 గంటల పాటు సీబీఐ సోదాలు నిర్వహించింది. ఏమీ దొరకలేదు. నా బ్యాంక్ లాకర్ను తనిఖీ చేశారు.. అందులోనూ ఏమీ కనిపించలేదు. నా గ్రామంలో సోదాలు నిర్వహించారు. అక్కడ కూడా ఎలాంటి ఆధారాలూ లభించలేదు. నాకు ఫోన్ చేసి సోమవారం ఉదయం 11 గంటలకు సీబీఐ ప్రధాన కార్యాలయానికి విచారణ కోసం రావాలని కోరారు. నేను సోమవారం.. సీబీఐ విచారణకు హాజరవుతా. అధికారులకు పూర్తిగా సహకరిస్తా' అని మనీశ్ సిసోదియా ట్వీట్ చేశారు.
దిల్లీలో గతేడాది నవంబరులో కేజ్రీవాల్‌ ప్రభుత్వం ప్రవేశపెట్టిన నూతన ఎక్సైజ్ విధానంలో అనేక అవకతవకలు జరిగాయన్న ఆరోపణలు వచ్చాయి. మద్యం విధానంలో నిబంధనల ఉల్లంఘన జరగడం సహా విధానపరమైన లోపాలున్నట్లు దిల్లీ ప్రధాన కార్యదర్శి నివేదిక ఇచ్చారు. టెండర్ల విధానంలో కొందరికి ఆయాచిత లబ్ధి చేకూరేలా నిర్ణయాలు తీసుకున్నట్లు నివేదికలో పేర్కొన్నారు. దీంతో ఈ ఉల్లంఘనలపై దర్యాప్తు చేపట్టాలని దిల్లీ లెఫ్టినెంట్‌ గవర్నర్‌ వీకే సక్సేనా.. సీబీఐకి సిఫార్సు చేశారు. ఈ వ్యవహారంలో ఎక్సైజ్ శాఖకు ఇన్‌ఛార్జ్‌గా ఉన్న మనీశ్ సిసోదియా పాత్రనూ అందులో ప్రస్తావించారు.
ఇవీ చదవండి: రేప్ కేసు దోషికి 15 రోజుల పెరోల్.. భార్యను గర్భవతిని చేసేందుకే!
ATMలో సమస్య.. రూ.500 తిరిగివ్వని బ్యాంక్.. లక్ష ఫైన్ వేసిన కోర్ట్
