'నాడు కుట్ర పన్నిన వారే ఇప్పుడు ఒకరిపై ఒకరు బురద చల్లుకుంటున్నారు'.. నందిగ్రామ్, సింగూర్ ఘటనలపై భాజపా, తృణమూల్ కాంగ్రెస్లను ఉద్దేశించి బంగాల్ మాజీ ముఖ్యమంత్రి బుద్ధదేవ్ భట్టాచార్య ఇటీవల చేసిన వ్యాఖ్యలివి.
ప్రస్తుత రాజకీయ పరిస్థితి, రాష్ట్రంలో సమస్యలపై 77 ఏళ్ల బుద్ధదేవ్ తొలిసారి తన గళాన్ని విప్పారు. గత ఆరేళ్లుగా సీపీఐ(ఎం) కార్యకలాపాలపై మౌనం వహించిన ఈ నేత.. తాజాగా అందించిన ఆడియో సందేశానికి రాజకీయ వర్గాల్లో విశేష ప్రాధాన్యం ఏర్పడే అవకాశం ఉందని విశ్లేషకులు అభిప్రాయపడుతున్నారు.
అసలు ఆడియోలో ఏముంది?
"ఒకప్పుడు బంగాల్కు గర్వకారణంలా ఉండే స్నేహపూర్వక వాతావరణం ఇప్పుడు విషతుల్యంగా మారింది. నందిగ్రామ్, సింగూర్ ఘటనలకు కారకులైన వారే ఇప్పుడు ఒకరిపై ఒకరు బురదచల్లుకుంటున్నారు. ఓవైపు నిరంకుశమైన తృణమూల్ కాంగ్రెస్, మరోవైపు విభజన రాజకీయాలు, పెట్టుబడిదారు ఆర్థిక వ్యవస్థను ప్రోత్సహించే భాజపా ఉంది. భాజపా వెనుక ప్రమాదకరమైన సిద్ధాంతలతో నడిచే ఆర్ఎస్ఎస్ ఉంది. వీటి ఉద్దేశం రాష్ట విధ్వంసం. యువత కలలు ఛిద్రమయ్యాయి. వైద్య, విద్యా వ్యవస్థలు నిర్వీర్యమయ్యాయి. రాష్ట్రంలో ఉపాధిలేక యువత వలస వెళ్తోంది. ఈ ఎన్నికలు బంగాల్ రాజకీయాల్లో కీలక మలుపు. ఈ పరిస్థితిని అంతమొందించాలి. బంగాల్ ప్రజలు వామపక్షాలు, కాంగ్రెస్ కూటమికి మద్దతుగా నిలవాల్సిన సమయం ఆసన్నమైంది."
-బుద్ధదేవ్ భట్టాచార్య, సీపీఐ(ఎం) నేత
బుద్ధదేవ్ కీలక పాత్ర పోషిస్తారా?
మాజీ ముఖ్యమంత్రి జోతిబసు నుంచి పగ్గాలు అందుకుని రాష్ట్రాన్ని పాలించిన బుద్ధదేవ్కు.. నందిగ్రామ్, సింగూర్ ఘటనలతో ఎదురుదెబ్బ తగిలింది. ఇది సీపీఎం పైన కూడా తీవ్ర ప్రభావం చూపింది. దీంతో 34ఏళ్ల పాటు బంగాల్ను నిర్విరామంగా పాలించిన వామపక్షాలు.. ప్రస్తుతం తన ఉనికిని కాపాడుకోలేని స్థితికి దిగజారాయి.
బుద్ధదేవ్.. లెఫ్ట్ పార్టీ తరపున చివరిసారిగా 2019 లోక్సభ ఎన్నికల ప్రచారం చేశారు. కోల్కతా పరేడ్ గ్రౌండ్లో నిర్వహించిన సభలో పాల్గొన్నారు. అనారోగ్యం కారణంగా ఎలాంటి ప్రసంగాలు చేయకపోయినా.. ప్రచారంలో పాల్గొనడం ద్వారా పార్టీ వర్గాలను ఉత్సాహపరిచారు. కానీ ఆ ఎన్నికల్లో పార్టీకి ఇవేవీ కలిసిరాలేదు. అందుకు భిన్నంగా వామపక్షాలకు ఏడు శాతం ఓట్లు మాత్రమే లభించాయి. అయితే.. బుద్ధదేవ్ ఇప్పటికీ గేమ్ చేంజరే అని పార్టీ వర్గాలు భావిస్తున్నాయి. దీనికి గత ఎన్నికల ఫలితాలతో సంబంధం లేదని పేర్కొంటున్నాయి.
దీదీ వ్యాఖ్యలతో..
2007, మార్చి 14న జరిగిన నందిగ్రామ్ ఘటనపై బంగాల్ ముఖ్యమంత్రి మమతా బెనర్జీ ఇటీవల కీలక వ్యాఖ్యలు చేశారు. ఘటన సందర్భంగా కాల్పులు జరగడానికి కారణం సువేందు, అతని తండ్రి శిశిర్ అధికారి అని పరోక్షంగా ఆరోపించారు. ఈ వివాదస్పద వ్యాఖ్యలను ప్రామాణికంగా తీసుకుని.. నందిగ్రామ్ ఘటనకు బుద్ధదేవ్ ఆధ్వర్యంలోని ప్రభుత్వానికి ఎలాంటి సంబంధం లేదంటూ సీపీఐ(ఎం) ప్రచారం చేస్తోంది. ఇదివరకు బుద్ధదేవ్ ఇచ్చిన లిఖిత పూర్వక ప్రకటనను కూడా ప్రచారంలో భాగం చేసింది. ఈ చర్యల ద్వారా మరోసారి ప్రజల నమ్మకాన్ని గెలుచుకునేందుకు ప్రయత్నిస్తోంది.
ఈ ఏడాది మార్చి 2న బ్రిగేడ్ పరేడ్ గ్రౌండ్లో నిర్వహించిన ర్యాలీలో బుద్ధదేవ్ పాల్గొంటారని పార్టీ ఆశించింది. కానీ అటువంటిది ఏమీ జరగలేదు. ఈ సభలో ఇండియన్ సెక్యులర్ ఫ్రంట్ వ్యవస్థాపకుడు అబ్బాస్ సిద్ధిఖీ హాజరయ్యారు. ఈ సమావేశంలో వామపక్ష నేతలు బుద్ధదేవ్ పేరును ఒక్కసారి కూడా ప్రస్తావించలేదు. ఇలా.. చివరి నిమిషంలో బుద్ధదేవ్ ఆడియోను విడుదల చేయడం ఎంత వరకు కలిసొస్తుందనే ప్రశ్న ఉత్పన్నమవుతోంది. బుద్ధదేవ్ ఆడియో క్లిప్ పార్టీకి బలం చేకురుస్తుందా? లేదా? అనే విషయంపై సందేహాలు వ్యక్తమవుతున్నాయని విశ్లేషకులు అభిప్రాయపడుతున్నారు.
ఇవీ చదవండి :
