Chalo Card: టికెట్టుకు సరిపడా నగదు ఉండకపోవటం.. ఇచ్చిన డబ్బుకు కండక్టర్ వద్ద చిల్లర లేకపోవడం వంటి సమస్యలను బస్సు ప్రయాణికులు తరచూ ఎదుర్కొంటారు. ఈ ఇబ్బందులకు చెక్ పెడుతూ కేరళలోని కాసరగోడ్లో 'ఛలో ట్రావెల్ కార్డ్' అందుబాటులోకి తీసుకొచ్చారు. జిల్లాలోని బస్సు సర్వీసుల డిజిటలీకరణలో భాగంగా ఈ కొత్త పద్ధతి.. విడతల వారీగా అమలు కానుంది.
ప్రస్తుతం మెట్రో రైల్వేస్టేషన్లలో అందుబాటులో ఉన్న మెట్రో కార్డు వంటిదే ఈ ఛలో ట్రావెల్ కార్డు. ఇందులో రూ.30 నుంచి రూ. 3వేల వరకు రీఛార్జ్ చేసుకోవచ్చు. ఈ కార్డుతో టికెట్ ధరపై 10 శాతం డిస్కౌంట్ కూడా అందిస్తున్నారు.
మరోవైపు.. కేరళ ప్రభుత్వం ప్రతిష్ఠాత్మకంగా చేపడుతున్న వాటర్ మెట్రో ప్రాజెక్ట్ కూడా త్వరలోనే కొచ్చి ప్రజలకు అందుబాటులోకి రానుంది. మరో నాలుగు బోట్లు సిద్ధమయ్యాక.. మొదటి విడతలో భాగంగా వైట్టిలా నుంచి కక్కానాడ్ మధ్య సేవలు ప్రారంభం కానున్నాయి. 50 మంది ప్రయాణించేందుకు వీలుగా కొన్ని.. 100 మంది ప్రయాణించేలా మరికొన్ని బోట్లను కొచ్చిన్ షిప్యార్డు తయారుచేస్తోంది.
76 కిలోమీటర్ల జల మార్గంలో 38 టెర్మినల్స్ ఏర్పాటు చేసిన కొచ్చి వాటర్ మెట్రో.. మొత్తం 78 బోట్లను అందుబాటులోకి తేనుంది.
ఇదీ చూడండి : పైలట్ చాకచక్యం.. సీఎం మమత సేఫ్
