Bulli Bai case: బుల్లీ బాయ్ యాప్ కేసు విచారణకు సంబంధించి పోలీసులు కీలక విషయాలు వెల్లడించారు. దీని ప్రధాన సూత్రధారి అయిన 21 ఏళ్ల బీటెక్ విద్యార్థి నీరజ్ బిష్ణోయ్ కేవలం ఫేమస్ కావాలనే ఉద్దేశంతోనే యాప్ను రూపొందించినట్లు చెప్పారు. సొంత గుర్తింపు కోసమే ఈ పని చేసినట్లు అతడు అంగీకరించినట్లు వెల్లడించారు. ఇందులో వేరే వాళ్లకు సంబంధముందా అనే విషయంపై ఇప్పటివరకు జరిగిన విచారణలో ఎలాంటి సమాచారం లభించలేదని వివరించారు.
Sulli deals case
అయితే నీరజ్కు సుల్లీ డీల్స్ కేసుతోనూ సంబంధాలు ఉండే అవకాశముందని పోలీసులు చెప్పారు. ఈ విషయంపైనా దర్యాప్తు చేస్తున్నామన్నారు. బుల్లీ బాయ్ నెట్ వర్క్ సుల్లీ డీల్స్కు సంబంధాలు ఉండొచ్చని అనుమానం వ్యక్తం చేశారు. నీరజ్ ఉపయోగించిన పరికరాలను స్కాన్ చేస్తున్నామని, అతని నుంచి మరిన్ని విషయాలు రాబడుతామని చెప్పారు. ఆ తర్వాత మొత్తం వ్యవహారం బట్టబయలవుతుందన్నారు. ఈ కేసులో ఓ ఆసక్తికర విషయమొకటి తమ దృష్టికి వచ్చిందని అధికారులు చెప్పారు.. సుల్లీ డీల్స్పై ఓ మహిళా జర్నలిస్టు పోలీసులకు ఫిర్యాదు చేస్తే.. కేసు విచారణ గురించి కూపీ లాగేందుకు నీరజ్.. మీడియా ప్రతినిధినని చెప్పి సైబర్ సెల్ పోలీసులను తప్పుదోవ పట్టించేందుకు ప్రయత్నించాడని వెల్లడించారు.
"సుల్లీ డీల్స్ కేసు దర్యాప్తు జరుగుతున్న సమయంలో మా బృందాన్ని తప్పుదోవ పట్టించేందుకు నీరజ్ ప్రయత్నించాడు. వాట్సాప్ కాల్ చేసి తాను మీడియా ప్రతినిధినని చెప్పాడు. కేసు విచారణ గురించి కూపీ లాగేందుకు ప్రయత్నించాడు. అతని ఫోన్ రికార్డ్సును పరిశీలిస్తే మాకు ఈ విషయం తెలిసింది. బుల్లీబాయ్ యాప్ సృష్టించడానికి ముందే ట్విట్టర్ ఖాతా క్రియేట్ చేసి మహిళ ఫొటోను(ఫిర్యాదు చేసిన బాధితురాలు) అప్లోడ్ చేసి ఆమెను వేలం వేశాడు. సుల్లీ డీల్స్ కేసు విచారణ జరగుతుండగా ఇలాంటి మరో ట్విట్టర్ ఖాతా గురించి తెలిసింది."
-పోలీసు అధికారి
Bulli Bai mastermind
బుల్లీ బాయ్ యాప్ సూత్రధారి నీరజ్ను అరెస్టు చేసిన తర్వాత ఓ వర్గానికి చెందిన వందల మంది మహిళల కేసులను పరిష్కరించినట్లు పోలీసులు చెప్పారు. వీరందరి ఫొటోలను మార్ఫ్ చేసి వాళ్లకు తెలియకుండానే యాప్లో వేలానికి పెట్టారని తెలిపారు.
Niraj Bishnoi
బుల్లీ బాయ్ యాప్తో పాటు గేమింగ్ క్యారెక్టర్ గియూ పేరుతో ట్విట్టర్లో చాలా ఖాతాలు క్రియేట్ చేశాడు నీరజ్. వాటిలో మహిళల అసభ్య ఫొటోలు పెట్టి వారిని వేలానికి వేస్తున్నట్లు పోస్టులు పెట్టాడు. సుల్లీ డీల్స్ కేసు విచారణ సమయంలోనూ ఓ అమ్మాయి పేరుతో నకిలీ ఖాతా సృష్టించి పోలీసులను సంప్రదించేందుకు ప్రయత్నించాడు.
ఇదీ చదవండి: రూ.1000కి ఫేక్ వ్యాక్సిన్ సర్టిఫికేట్- నిందితుడు అరెస్ట్
