సరిహద్దు దాటి భారత్​లోకి మూడేళ్ల బాలుడు.. జవాన్లు ఏం చేశారంటే?

దారి తప్పి భారత భూభాగంలోకి వచ్చిన పాకిస్థాన్​కు చెందిన మూడేళ్ల బాలుడిని అతడి తండ్రికి అప్పగించారు భారత జవాన్లు. ఈ సంఘటన పంజాబ్​లోని అంతర్జాతీయ సరిహద్దు వద్ద శుక్రవారం రాత్రి జరిగింది.

భారత సైనికులు మానవత్వాన్ని చాటుకున్నారు. దారి తప్పి భారత భూభాగంలోకి వచ్చిన పాకిస్థాన్​కు చెందిన మూడేళ్ల బాలుడిని బీఎస్​ఎఫ్ జవాన్లు.. అతని కుటుంబానికి అప్పగించారు. పంజాబ్‌లోని అంతర్జాతీయ సరిహద్దుకి అనుకోకుండా పాక్​కు చెందిన బాలుడు వచ్చేశాడు.

బాలుడికి ఆహారాన్ని ఇచ్చిన బీఎస్​ఎఫ్ అధికారులు

శుక్రవారం సాయంత్రం 7 గంటల సమయంలో పంజాబ్​లోని ఫిరోజ్‌పుర్ సెక్టార్‌లో అంతర్జాతీయ కంచె దగ్గర ఏడుస్తున్న బాలుడిని బీఎస్​ఎఫ్ దళాలు గమనించాయి. అప్పటికే ఆ బాలుడు 'నాన్న నాన్న' అంటూ ఏడుస్తున్నాడు. అక్కడికి చేరుకున్న బీఎస్ఎఫ్ దళాలు.. బాలుడికి తినుబండారాలు, నీళ్లు ఇచ్చారు. అనంతరం పాకిస్థాన్ రేంజర్స్‌కు సమాచారం అందించారు. పాక్​ రేంజర్ సమక్షంలో రాత్రి 9.45 నిమిషాలకు బాలుడిని అతడి తండ్రికి అప్పగించారు.

ఇవీ చదవండి: స్పైస్​జెట్ విమానంలో పొగలు.. 5వేల అడుగుల ఎత్తులో.. కానీ లక్కీగా..