బొగ్గు గని తవ్వుతు గల్లంతైన భర్త కోసం.. ఓ మహిళ రెండు నెలల పాటు అలుపెరగని పోరాటం చేసింది. మైనింగ్ మాఫియా అక్రమ బొగ్గుగనుల తవ్వకాల్లో.. బలైన భర్త జాడ కోసం ఏకంగా రాష్ట్ర డీజీపీనే కలిసింది. మైనింగ్ మాఫియా బెదిరించినా.. రూ.5 లక్షల ఆశ జూపిన పట్టువిడవలేదు. స్థానిక పోలీసులు సహకారం అందించకున్నా ఏ మాత్రం వెనక్కి తగ్గలేదు. చివరకు బొగ్గు గనుల కింద కుళ్లిపోయిన.. తన భర్త శవాన్ని చూసి బోరున విలపించింది. అసోంలో ఈ ఘటన జరిగింది.
ఇదీ జరిగింది..
ఆ మహిళ పేరు ఊర్వశి మోరన్. భర్త ప్రాంజల్ మోరన్. వీరిద్దరు తిన్సుకియా జిల్లాలోని షుకాని గ్రామానికి చెందిన వారు. జనవరి 12న లిడులోని మైనింగ్ మాఫియా చేపట్టిన బొగ్గు తవ్వకాలలో.. ప్రాంజల్ పనిచేస్తు గల్లంతయ్యాడు. అతడి జాడ కోసం కుటుంబ సభ్యులు, బంధువులు తీవ్రంగా గాలించారు. అయినా ఫలితం లేకపోయింది. దీంతో మార్చి 4న.. లిడు పోలీసులను ఆశ్రయించారు కుటుంబ సభ్యులు. కానీ మాఫియా గ్యాంగ్ ఒత్తిడితో వాళ్ల ఫిర్యాదును పోలీసులు స్వీకరించలేదు. ఊర్వశికి సైతం రూ.5 లక్షలు ఇవ్వజూపింది మైనింగ్ మాఫియా గ్యాంగ్. కానీ ఊర్వశి ఆ డబ్బును తీసుకోలేదు. తనకు తన భర్త కావాలని డిమాండ్ చేసింది.
650 కిలోమీటర్ల దూరమున్న గుహవటికి వెళ్లి డీజీపీని కలిసిన ఊర్వశి..
స్థానిక పోలీసులు ఎంతకీ స్పందించకపోవడం వల్ల.. 650 కిలోమీటర్ల దూరమున్న గుహవటికి వెళ్లాలని నిర్ణయించుకుంది ఊర్వశి. వెంటనే తన బిడ్డను చంకనెత్తుకుని గుహవటికి చేరుకుంది. రాష్ట్ర డీఐజీ.. జీపీ సింగ్ను తన కార్యాలయంలో కలిసింది. ఘటన మొత్తాన్ని ఆయనకు వివరించింది. ఎలాగైన తన భర్తను వెతకాలని ప్రాధేయపడింది. దీనిపై స్పందించిన డీఐజీ.. ఊర్వశి భర్త ప్రాంజల్ను వెతికిపెడతామని ఆమెకు హామీ ఇచ్చారు. దక్షిణ అసోం ఇన్‌ఛార్జ్ ఐజీపీ జిత్మల్ డేల్‌కు దర్యాప్తు బాధ్యతను అప్పగించారు.
బొగ్గు గనుల కింద కుళ్లిపోయిన స్థితిలో ప్రాంజల్ మృతదేహం..
ప్రాంజల్ తప్పిపోయిన బొగ్గుగని ప్రాంతానికి.. సోమవారం తన టీంతో వెళ్లాడు ఐజీపీ జిత్మల్ డేల్‌. వెంటనే గాలింపు చర్యలు చేపట్టారు. శుక్రవారం బొగ్గు గనుల కింద కుళ్లిపోయిన స్థితిలో ప్రాంజల్ మృతదేహాన్ని గుర్తించారు. భర్త చనిపోయిన విషయాన్ని తెలుసుకున్న ప్రాంజల్ భార్య, అతడి కుటుంబ సభ్యులు కన్నీరుమున్నీరయ్యారు. ప్రస్తుతం ఈ ఘటన మొత్తం రాష్ట్రవ్యాప్తంగా చర్చనీయాంశంగా మారింది. ఘటనలో ఇద్దరిని అదుపులోకి తీసుకున్నామని పోలీసులు తెలిపారు.
