బంగాల్​లో భాజపా అభ్యర్థి కారుపై బాంబు దాడి

బంగాల్​లో ఎన్నికల వేళ.. బాంబుదాడి కలకలం రేపింది. భాజపా అభ్యర్థికి చెందిన వాహనంపై గుర్తు తెలియని వ్యక్తులు నాటు బాంబును విసిరినట్టు పోలీసులు తెలిపారు. దీని వెనుక టీఎంసీ హస్తం ఉందని భాజపా అభ్యర్థి ఆరోపించారు.

బంగాల్​లో భాజపా అభ్యర్థి కారుపై బాంబుదాడి జరిగినట్టు పోలీసులు తెలిపారు. నాటు బాంబులుగా గుర్తించినట్టు చెప్పారు. అయితే.. ఈ ఘటనలో ఎలాంటి ప్రాణనష్టం జరగలేదని స్పష్టం చేశారు.

ఉత్తర 24 పరగణాల జిల్లా, ఖార్దా అసెంబ్లీ నియోజకవర్గం నుంచి పోటీ చేస్తున్న శిల్భద్ర దత్త.. తాను రోడ్డుపై నిల్చుని టీ తాగుతున్న సమయంలో ఈ దాడి జరిగిందని ఆరోపించారు.

"నేను కల్యాణి ఎక్స్​ప్రెస్​ వేపై కారు పార్క్ చేసి టీ తాగే సమయంలో ఎవరో బాంబు విసిరారు. అది.. ఆపి ఉన్న నా వాహనానికి అతి సమీపంలోనే పేలింది. దీని వెనుక తృణమూల్​ కాంగ్రెస్​ కుట్ర ఉంది. దీనిపై మేము ఎలక్షన్​ కమిటీ(ఈసీ)కి ఫిర్యాదు చేస్తాం."

- శిల్భద్ర దత్త, భాజపా ఎమ్మెల్యే అభ్యర్థి

బాంబు దాడి వ్యవహారంపై పోలీసులు కేసు నమోదు చేసుకుని దర్యాప్తు చేపట్టారు.

ఇదీ చదవండి: కేంద్ర మంత్రి​ సహా కాంగ్రెస్ కీలక​ నేతలకు కరోనా