బిహార్లోని పట్నాలో ఘోర ప్రమాదం జరిగింది. గంగానదిలో ఓ పడవ బోల్తాపడింది. ఈ ఘటనలో ఏడుగురు గల్లంతయ్యారు. ప్రమాద సమయంలో బోటులో 14 మంది ఉన్నారు. శుక్రవారం మధ్యాహ్నం 2.30 గంటల ప్రాంతంలో మహ్వీర్ తోలా ఘాట్ సమీపంలో జరిగిందీ ఘటన.
ఈ పడవ ప్రమాదంలో ఏడుగురు గల్లంతవ్వగా.. మరో ఏడుగురు ఈత కొట్టుకుని ఒడ్డుకు చేరుకున్నారని అధికారులు తెలిపారు. గల్లంతైనవారి కోసం ఎస్డీఆర్ఎఫ్, ఎన్డీఆర్ఎఫ్ దళాలు ఆపరేషన్ నిర్వహిస్తున్నాయని పేర్కొన్నారు. పశువులకు మేత తీసుకురావడానికి వెళ్లగా ఈ ప్రమాదం జరిగిందని వెల్లడించారు.
కార్గో నౌక బోల్తా..
ఆరు ట్రక్కులతో వెళ్తున్న కార్గో నౌక.. గంగా నదిలో బోల్తాపడింది. ఈ ప్రమాదంలో ఇద్దరు గల్లంతయ్యారు. బిహార్లోని కటిహార్లో ఈ ఘటన వెలుగుచూసింది. శుక్రవారం ఉదయం 8 గంటలకు జరిగిందీ ఘటన. గల్లంతైనవారి కోసం గాలింపు చర్యలు చేపడుతున్నట్లు చెప్పారు. కార్గో నౌక.. దిలీప్ బిల్డ్కాన్ కంపెనీ(డీబీఎల్)కి చెందినదిగా అధికారులు తెలిపారు. ఈ కంపెనీ సాహిబ్గంజ్, మణిహారి మధ్య గంగానదిపై వంతెన నిర్మిస్తోంది.
