భారతీయ జనతా పార్టీకి కూచ్బిహార్ కాల్పుల ఘటన తీవ్ర నష్టాన్ని కలిగించబోతోందని గూర్ఖా జనముక్తి మోర్చా(జీజేఎం)లోని ఓ వర్గం నేత బిమల్ గురంగ్ తెలిపారు. బంగాల్ ఉత్తర ప్రాంతంలో మరో నాలుగు దఫాల్లో జరగనున్న పోలింగ్పై దీని ప్రభావం అధికంగా ఉంటుందని, ఓటర్ల ఆగ్రహాన్ని భాజపా చవిచూడక తప్పదని పీటీఐ వార్తా సంస్థకు ఇచ్చిన ఇంటర్వ్యూలో అభిప్రాయపడ్డారాయన.
గూర్ఖాల్యాండ్కు ప్రత్యేక రాష్ట్ర హోదా కల్పిస్తామనే హామీతో గత 12 ఏళ్లుగా భాజపా ఓట్లు పొందుతూ.. ఇక్కడి ప్రజలను వంచిస్తోందని గురంగ్ ఆరోపించారు. 2009 నుంచి భాజపా ఎంపీలను డార్జిలింగ్ లోక్సభ స్థానం నుంచి గెలిపించినా తమకు చేసిందేమీ లేదన్నారు. గతేడాది అక్టోబర్లో భాజపా నేతృత్వంలోని ఎన్డీఏను వీడిన బిమల్ గురంగ్.. ప్రస్తుత అసెంబ్లీ ఎన్నికల్లో తృణమూల్ కాంగ్రెస్కు సన్నిహితమయ్యారు. డార్జిలింగ్, దాని పరిసర ప్రాంతాల సమగ్ర అభివృద్ధికి శాశ్వతమైన రాజకీయ పరిష్కారం కనుగొందామని టీఎంసీ అధ్యక్షురాలు, ముఖ్యమంత్రి మమతా బెనర్జీ హామీ ఇచ్చారని తెలిపారు.
54 అసెంబ్లీ నియోజకవర్గాల్లో..
అమాయకులైన కూచ్బిహార్ ప్రజలు కేంద్ర సాయుధ బలగాల చేతుల్లో ప్రాణాలు కోల్పోవడం ఏ మాత్రం ఆమోదయోగ్యం కాదన్నారు గురంగ్. ఈ చర్య వల్ల బంగాల్ ఉత్తరం పరిధిలోని 8 జిల్లాల్లో ఉన్న 54 శాసనసభ నియోజకవర్గాల్లో భాజపా వ్యతిరేక ఫలితాలను చవిచూడనుందని పేర్కొన్నారు. 2019 పార్లమెంట్ ఎన్నికల్లో ఈ ప్రాంతంలోని మొత్తం 8 లోక్సభ స్థానాల్లో ఏడింటిని జీజేఎం మద్దతుతో భాజపా గెలుచుకుందని గురంగ్ గుర్తు చేశారు. మారిన పరిస్థితుల నేపథ్యంలో కమలం పార్టీకి ఇక్కడ ఎదురుగాలి వీస్తుందని, ఓటర్లపై కాల్పుల ఘటన దీనికి మరింతగా ఆజ్యం పోసిందని వివరించారు. భాజపా విజయం సాధించిన 7 లోక్సభ స్థానాల పరిధిలోని అసెంబ్లీ సీట్లలోనూ ఆ పార్టీ అభ్యర్థులకు ఓటమి తప్పదని పేర్కొన్నారు. జీజేఎంలోని రెండు వర్గాల నేతలు.. బినయ్ తమంగ్, బిమల్ గురంగ్ ప్రస్తుత ఎన్నికల్లో టీఎంసీకి మద్దతిస్తున్నారు.
నాలుగో దశలో 79.90 శాతం పోలింగ్
బంగాల్లో శనివారం జరిగిన నాలుగో దశ ఎన్నికల్లో 79.90 శాతం పోలింగ్ నమోదైందని ఎన్నికల అధికారి ప్రకటించారు. 5 జిల్లాల పరిధిలోని 44 నియోజక వర్గాలకు ఈ ఎన్నికలు జరిగాయి. హింసాత్మక ఘటనలు జరిగిన కూచ్బిహార్ జిల్లాలో అత్యధికంగా 84.76 శాతం మంది ఓటర్లు తమ ఓటు హక్కును వినియోగించుకున్నారు.
ఇదీ చదవండి: ఎన్నికల ప్రధాన కమిషనర్గా సుశీల్ చంద్ర!
