'నకిలీ ఫిర్యాదులు చేసేవారిపై కఠిన చర్యలు!'

క్రిమినల్​ కేసుల్లో నకిలీ ఫిర్యాదులను అరికట్టేందుకు మార్గదర్శకాలను రూపొందించాలని కోరుతూ ఓ భాజపా నేత.. సుప్రీం కోర్టులో పిల్​ దాఖలు చేశారు. అలాంటి తప్పుడు విచారణల వల్ల బాధితులుగా మారిన వారికి పరిహారం చెల్లించేలా కేంద్రాన్ని ఆదేశించాలని కోరారు.

క్రిమినల్​ కేసుల్లో తప్పుడు ఫిర్యాదులు చేసేవారిపై కఠిన చర్యలు తీసుకునేలా మార్గదర్శకాలు రూపొందించాలని కేంద్రాన్ని ఆదేశించాలని సుప్రీంకోర్టును భాజపా నేత ఒకరు కోరారు. అటువంటి తప్పుడు విచారణల వల్ల ఇబ్బందులు పడ్డవారికి పరిహారం చెల్లించేలా నిర్దేశించాలని కోరారు. ఈ మేరకు ప్రజా ప్రయోజన వ్యాజ్యాన్ని దాఖలు చేసిన భాజపా నేత కపిల్​ మిశ్రా... ఉత్తర్​ప్రదేశ్​ ప్రభుత్వం, కేంద్రాన్ని ప్రతివాదులుగా పేర్కొన్నారు.

జనవరి 28న అలహాబాద్​ హైకోర్టు ఓ రేప్​ కేసులో ఇచ్చిన తీర్పు నేపథ్యంలో కపిల్​ మిశ్రా ఈ వ్యాజ్యం దాఖలు చేశారు. ఉత్తర్​ప్రదేశ్​కు చెందిన విష్ణు తివారీపై 2000 సంవత్సరంలో ఓ మహిళ అత్యాచార ఆరోపణలు మోపింది. దీనిపై తాజాగా విచారణ జరిపిన అలహాబాద్​ హైకోర్టు విష్ణు తివారీని నిర్దోషి అని తేల్చింది. భూవివాదం కారణంగానే సదరు మహిళ.. తివారీపై తప్పుడు ఆరోపణలు మోపిందని పేర్కొంది. 2000 సెప్టెంబర్​ 16న తివారీని ఎస్సీ, ఎస్టీ అత్యాచార నిరోధక చట్టం కింద పోలీసులు అరెస్టు చేశారు.

'ఆత్మహత్యలకు పాల్పడతారు'

ప్రత్యేక చట్టాల కింద విచారణ ఎదుర్కొంటున్న ఖైదీలకు సంబంధించిన కేసులను త్వరగా పరిష్కరించడానికి ఓ యంత్రాంగాన్ని రూపొందించాలని కపిల్​ మిశ్రా తన వ్యాజ్యంలో కోరారు. నకిలీ ఫిర్యాదులను దాఖలు చేయడం ద్వారా ఎస్సీ, ఎస్టీ అట్రాసిటీ చట్టం దుర్వినియోగం అవుతోందని అన్నారు. ఇలాంటి తప్పుడు కేసుల వల్ల అమాయకులు ఆత్మహత్యలకు పాల్పడే ప్రమాదం ఉందని పేర్కొన్నారు.

ఇదీ చూడండి: 'ఆ తీర్పు చదువుతుంటే తలనొప్పి వచ్చింది'