'స్నేహితుడా.. స్నేహితుడా.. రహస్య స్నేహితుడా..' ఇది ఓ సినిమా పాట. అయితే ప్రస్తుతం బిహార్లో ఎల్జేపీ-భాజపా మధ్య దోస్తీ ఇలానే కనిపిస్తోంది. బిహార్ ఎన్నికల సమయంలో ఎల్జేపీతో 'రాష్ట్రంలో కుస్తీ- కేంద్రంలో దోస్తీ' అన్నట్లు నడిచిన భాజపా ఇప్పుడు స్నేహగీతం ఆలపిస్తోంది. జేడీయూతో ఓవైపు ప్రచ్ఛన్న యుద్ధం నడుస్తోన్న తరుణంలో ఎల్జేపీకి రాష్ట్రంలో ఎన్డీఏ గేట్లు తెరిచేందుకు సిద్ధమవుతోంది. ఎల్జేపీ అధ్యక్షుడు చిరాగ్ పాసవాన్ను త్వరలోనే కేంద్ర కేబినెట్లోకి తీసుకునే అవకాశం ఉన్నట్లు సమాచారం. తమపై ధిక్కార స్వరం వినిపిస్తోన్న జేడీయూను దారికి తేవడానికే ఎల్జేపీని తిరిగి ఎన్డీఏలోకి భాజపా ఆహ్వానిస్తోందా?
నువ్వే కావాలి..!
బిహార్ అసెంబ్లీ ఎన్నికల్లో జేడీయూ ఘోరంగా దెబ్బతినడానికి కారణం ఎల్జేపీ అన్నది అందిరికీ తెలిసిన విషయమే. జేడీయూను నిలువరించడానికి ఇదంతా భాజపా వేసిన ఎత్తుగడ అన్నది విశ్లేషకుల మాట. ఏనాడూ ఎల్జేపీని భాజపా విమర్శించకపోవడమూ వారి రహస్య దోస్తీ వార్తలకు బలం చేకూరుస్తోంది.
కేంద్రంలో ఎల్జేపీ ఇప్పటికీ ఎన్డీఏలో కొనసాగుతోంది. వివిధ రాష్ట్రాల్లో పార్టీ బలాబలాలు బట్టి కొన్ని చోట్ల కలిసే ముందుకు వెళ్తున్నాం. బిహార్లో మాతో జేడీయూ కూటమి కట్టినా ఇతర రాష్ట్రాల్లో విడిగా పోటీ చేస్తోంది. భాజపా-ఎల్జేపీ బిహార్లో కలిసి లేకపోయినా కేంద్రంలో దోస్తీ కొనసాగిస్తున్నాయి.
- మృత్యుంజయ్ ఝా, భాజపా అధికార ప్రతినిధి
ప్రస్తుతం భాజపా నేతల మాటలు చూస్తే ఎల్జేపీపై ఓ వైపు వైరాన్ని, మరోవైపు ప్రేమను చూపిస్తూ ద్వంద్వ వైఖరి ప్రదర్శిస్తోందని విశ్లేషకులు అంటున్నారు.
అంతా మీ వల్లే..
అయితే ఎల్జేపీకి బిహార్లో తిరిగి భాజపా స్నేహహస్తం అందించడాన్ని జేడీయూ తీవ్రంగా వ్యతిరేకిస్తోంది. రాష్ట్ర అసెంబ్లీ ఎన్నికల్లో తమ ఘోర ప్రదర్శనకు ఎల్జేపీ కారణమని సీఎం నితీశ్ కుమార్ సహా జేడీయూ ప్రధాన కార్యదర్శి కేసీ త్యాగి బహిరంగంగానే విమర్శించారు. ఇటీవల ముగిసిన పార్టీ జాతీయ కార్యనిర్వహక కమిటీ సమావేశంలోనూ త్యాగి వ్యూహాత్మకంగా మాట్లాడారు.
"ఎల్జేపీ.. రాష్ట్రంలో, కేంద్రంలో ఎక్కడా ఎన్డీఏలో భాగస్వామిగా లేదు. ఎల్జేపీ వల్లే బిహార్ ఎన్నికల్లో ఎన్డీఏ మెజారిటీ మార్క్ దాటడానికి ఇబ్బంది పడింది."
- కేసీ త్యాగి, జేడీయూ ప్రధాన కార్యదర్శి
దివంగత రాం విలాస్ పాసవాన్ తనయుడైన చిరాగ్ పాసవాన్ బిహార్ ఎన్నికల్లో జేడీయూను ఘోరంగా దెబ్బతీశారు. జేడీయూకు పోటీగా ఎల్జేపీ అభ్యర్థులను నిలబెట్టడం వల్ల నితీశ్ పార్టీ 43 స్థానాలకే పరిమితమైంది. ఈ విషయాన్ని జేడీయూ పదేపదే గుర్తుచేస్తోంది.
ఇటీవ అరుణాచల్ ప్రదేశ్లో జేడీయూ ఎమ్మెల్యేలు భాజపాలో చేరడంపై నితీశ్ తీవ్ర అసంతృప్తి వ్యక్తం చేసినట్లు తెలుస్తోంది. ఇక ఇప్పుడు ఎల్జేపీని తిరిగి ఎన్డీఏలోకి భాజపా తీసుకుంటే నితీశ్ ఏం చేస్తారనేది చూడాలి.
కేబినెట్లోకి చిరాగ్..
వర్తమాన రాజకీయాల్లో రాంవిలాస్ పాసవాన్కు దళిత దిగ్గజంగా పేరుంది. ఆయన కన్నుమూసిన తర్వాత ఎన్డీఏకు దళితులు దూరం కాకుండా ఉండేలా భాజపా వ్యూహాలు రచిస్తోంది. దళితులకు భాజపా అండగా ఉంది అని తెలిసేలా చిరాగ్ పాసవాన్ను కేంద్ర కేబినెట్లోకి తీసుకోవాలని మోదీ యోచిస్తున్నట్లు సమాచారం. అలా చేస్తే అది నితీశ్కు పెద్ద షాక్ అని విశ్లేషకులు అంటున్నారు.
ఇప్పుడు కాదు..
కొద్ది నెలల్లో బంగాల్ అసెంబ్లీ ఎన్నికలు వస్తుండటం వల్ల ప్రస్తుతం ఎన్డీఏలో అలజడి రావడం మంచిది కాదని భాజపా యోచిస్తోంది. ఆ ఎన్నికల అనంతరం ఎల్జేపీతో తిరిగి జట్టు కట్టే అవకాశం ఉంది.
"భాజపా ఎప్పుడూ జాతీయ రాజకీయాలపైనే ఎక్కువగా దృష్టి సారిస్తుంది. అందుకే ఎల్జేపీని ఇప్పుడు ఎన్డీఏలోకి తీసుకోదు. అలాకాదు అని తీసుకుంటే ఎన్డీఏలో అలజడి వస్తుంది. అందుకే ఎల్జేపీ బిహార్లో ఎన్డీఏతో లేదు అని వారు అంటున్నారు. అయితే దళితులకు న్యాయం చేయడం కూడా భాజపాకు పెద్ద సవాలే అన్నది ఎల్జేపీ అభిప్రాయం."
- సంజయ్ కుమార్, రాజకీయ విశ్లేషకుడు
మేం ప్రత్యేకం
ఎల్జేపీ మాత్రం భాజపాతో దోస్తీపై ఆశాజనకంగానే ఉంది.
"ఎల్జేపీ- భాజపా బంధం సహజమైంది. జేడీయూలా మేం మహాకూటమి నుంచి వచ్చి ఎన్డీఏలో చేరలేదు. ఎల్జేపీ ఇచ్చిన షాక్తో జేడీయూ నేతలకు నిద్దట్లో కూడా పాసవాన్ కనిపిస్తున్నారు."
- శ్రవణ్ కుమార్, ఎల్జేపీ అధికార ప్రతినిధి
మరి బిహార్లో భాజపా-ఎల్జేపీ దోస్తీ ఎన్డీఏలో ఎలాంటి ప్రకంపనలు సృష్టిస్తుందో, నితీశ్ ఎలా వ్యవహరిస్తారో చూడాలి.
