ఎన్నికల ప్రచారంలో భాజపా నేతలు బయటి వ్యక్తులను పెద్ద సంఖ్యలో తీకుసురావడం వల్ల బంగాల్ కరోనా వ్యాప్తి మరింత పెరిగిందని ఆ రాష్ట్ర ముఖ్యమంత్రి మమతా బెనర్జీ ఆరోపించారు. జల్పాయిగుడిలో నిర్వహించిన ఓ బహిరంగ సభలో మాట్లాడిన ఆమె ఈ వ్యాఖ్యలు చేశారు. రాష్ట్రంలోని మెజారిటీ ప్రజలకు టీకాలు అందించాలని కేంద్రాన్ని సంప్రదిస్తే.. వారు సరిగా స్పందించడం లేదని విమర్శించారు. దీంతో కేసులు అంతకంతకూ పెరుగుతున్నాయని తెలిపారు.
తనపై 24 గంటల పాటు ఎన్నికల ప్రచారాన్ని నిషేధిస్తూ ఈసీ తీసుకున్న నిర్ణయాన్ని తప్పుబట్టిన దీదీ.. హిందూ, ముస్లిం, ఇతరులు అందరూ కలిసి ఓటు వేయాలని కోరడం తప్పా అని ప్రశ్నించారు. అలా అయితే ప్రధాని నరేంద్ర మోదీ ప్రచారం చేసిన ప్రతి బహిరంగ సభలోనూ తనని హేళన చేశారని, ఆయనపై ఎందుకు నిషేధం విధించలేదని మండి పడ్డారు.
భాజపాకు 70 సీట్లు గగనమే
ప్రస్తుతం జరుగుతున్న బంగాల్ శాసనసభ ఎన్నికల్లో భాజపా కనీసం 70 సీట్లు కూడా గెలవలేదని మమత అన్నారు. ఇప్పటివరకు జరిగిన నాలుగు దశల పోలింగ్లో 100సీట్లు గెలుచుకున్నామని ఇటీవల ప్రధాని నరేంద్రమోదీ చేసిన వాదనను కొట్టిపారేశారు.
"ఎన్నికలు జరిగిన 135 స్థానాల్లో భాజపా ఇప్పటికే 100 సీట్లు గెలుచుకుందని ప్రధాని మోదీ చెప్పారు. నేను ఇప్పుడు చెప్తున్నా.. ఫలితాలు వచ్చిన తరువాత వారికి మొత్తం 294 సీట్లలో 70 కూడా రావు."
-మమతా బెనర్జీ, బంగాల్ ముఖ్యమంత్రి
తృణమూల్ కాంగ్రెస్ అధికారంలోకి వస్తే ఎన్ఆర్సీని అడ్డుకుంటామని దీదీ అన్నారు. ఇందుకుగాను ప్రజలందరూ కలిసి టీఎంసీకి ఓటు వేసి గెలిపించాలని కోరారు.
ఇదీ చూడండి: 'కూచ్బిహార్ నేరస్థులను కఠినంగా శిక్షిస్తాం'
