ఓ బాలికపై ఆమె పెద్దనాన్నే లైంగిక దాడి చేశాడు. వరసకు కూతురు అయ్యే చిన్నారిపై అత్యాచారానికి పాల్పడ్డాడు. ఈ అమానవీయ ఘటన మధ్యప్రదేశ్లోని భోపాల్లో జరిగింది. కాగా, నిందితుడు పరారీలో ఉన్నాడు. అతడిని పట్టుకోడానికి పోలీసులు గాలింపు చర్యలు చేపట్టారు.
పోలీసుల వివరాల ప్రకారం.. రాటిబాద్ పోలీస్ స్టేషన్ పరిధిలో ఓ మహిళ ఉమ్మడి కుటుంబంతో నివాసం ఉంటోంది. ఆమెకు ముగ్గురు కుమార్తెలు. ఆ మహిళ భర్త ఆరు నెలల క్రితమే చనిపోయాడు. దీంతో ఇళ్లలో పనిమనిషిగా చేసుకుంటూ అత్తవారింట్లోనే ఉండి పిల్లల్ని చూసుకుంటోంది. కాగా, గురువారం రాత్రి తన చిన్న కుమార్తె ఏడుస్తూ కనిపించింది. ఎంత ఓదార్చినా ఏడుపు ఆపలేదు. ఆ బాలిక తన మర్మంగాల్లో నొప్పి వస్తోందని ఏడుస్తూనే ఉంది. దీంతో ఆ మహిళ తన కుమార్తె మర్మాంగాలను పరిశీలించి.. బాలికను ఏం జరిగిందని అడిగింది. దీంతో, పెద్దనాన్న తనపై అఘాయిత్యానికి పాల్పడ్డాడని బాలిక. దీంతో ఆ మహిళ తన కుమార్తెతో పోలీసులను ఆశ్రయించింది.
నిందితుడు పరార్...
చైల్డ్ హెల్ప్లైన్ ద్వారా పోలీసులు బాలికకు కౌన్సెలింగ్, వైద్య పరీక్షలు నిర్వహించారు. అనంతరం రేప్ కేసు నమోదు చేశారు. కాగా, తనపై కేసు నమోదైన విషయం తెలియగానే నిందితుడు పారిపోయాడు. అతడి కోసం పోలీసులు గాలింపు చర్యలు చేపట్టారు.
ఛత్తీస్గఢ్లో నక్సలైట్ల కలకలం..
ఛత్తీస్గఢ్లో మరోసారి నక్సలైట్ల చర్య కలకలం రేపింది. పోలీస్ ఇన్ఫార్మర్ అనే నెపంతో బీజాపుర్ జిల్లాలోని ఓ గ్రామానికి చెందిన సంజయ్ అనే వ్యక్తి(25)ని ఎత్తుకెళ్లారు. అనంతరం అతడిని హతమార్చారు. ఆ తర్వాత మృతదేహాన్ని రోడ్డు పక్కన పడేసి వెళ్లారు. కాగా, రోడ్డు పక్కన పడివున్న మృతదేహాన్ని స్వాధీనం చేసుకున్నామని పోలీసులు తెలిపారు. ఈ హత్యకు.. జాగర్గుండా ప్రాంతానికి చెందిన నక్సటైట్ కమిటీ బాధ్యత వహించిందని చెప్పారు. ఈ ఘటనపై కేసు నమోదు చేసుకుని.. నిందితులను పట్టుకోడానికి ఆపరేషన్ మొదలు పెట్టినట్లు జిల్లా ఎస్పీ ఆంజనేయ వర్షే తెలిపారు.
నలుగురు అదృశ్యం..
మరోవైపు, బీజాపుర్ జిల్లాలోని గంగలూరు ప్రాంతంలోని రోడ్డు కాంట్రాక్టర్తో పాటు ముగ్గురు వ్యక్తులు గత తొమ్మిదిరోజులుగా కనిపించడం లేదు. వారిని నక్సలైట్లే అపహరించి ఉండొచ్చని బాధితుల కుటుంబ సభ్యులు అనుమానం వ్యక్తం చేశారు. కానీ, ఈ విషయంపై అధికారికంగా జిల్లా యంత్రాంగం స్పందించలేదు. అయితే, బాధిత కుటుంబాలు ఈటీవీ భారత్తో మాట్లాడాయి. తమ కుటుంబ సభ్యులు ఎక్కడున్నారు? వారు క్షేమంగా తిరిగి వస్తారా? లేదా అని ఆవేదన వ్యక్తం చేశాయి. ఒకవేళ తమ కుటుంబ సభ్యులు నక్సలైట్లు అదుపులోకి తీసుకుంటే.. వారిని క్షేమంగా వదిలిపెట్టాలని కోరారు. కాగా, తొమ్మిది మంది కనిపించకుండా పోయినట్లు తమకు మీడియా ద్వారా తెలిసిందని జిల్లా ఎస్పీ చెప్పారు. కనిపించకుండా పోయిన వారిలో కొండగాన్కు చెందిన నిమేంద్ర కుమార్ దివాన్, నీల్చంద్ నాగ్, లోహండి గూడకు చెందిన తెమ్రూ నాగ్, బసూర్కు చెందిన చప్ది భాటియాలు ఉన్నారు.
