మహారాష్ట్ర ప్రభుత్వ ఏర్పాటులో శివసేనతో చేతులు కలిపే విషయంపై స్పష్టమైన సూచన చేసింది కాంగ్రెస్-ఎన్సీపీ కూటమి. రాష్ట్రంలో స్థిరమైన ప్రభుత్వం ఏర్పాటు చేస్తామని ప్రకటించారు మాజీ ముఖ్యమంత్రి, కాంగ్రెస్ సీనియర్ నేత పృథ్వీరాజ్ చవాన్. ఆయన మాటతో శివసేనతో జట్టుకట్టే విషయం మరింత బలపరిచినట్లయింది.
దిల్లీలోని శరద్ పవార్ నివాసంలో కాంగ్రెస్-ఎన్సీపీ ముఖ్యనేతల సుదీర్ఘ సమావేశం అనంతరం కీలక ప్రకటన చేశాయి ఇరు పార్టీలు. రాష్ట్రంలో నెలకొన్న రాజకీయ అనిశ్చితి త్వరలోనే ముగుస్తుందని ఆశాభావం వ్యక్తం చేశారు చవాన్. సేనతో చేతులు కలపాల్సిన అవసరాన్ని నిస్సందేహంగా వెల్లడించారు ఎన్సీపీ ప్రతినిధి నవాబ్ మాలిక్. మూడు పార్టీలు కలిసి రాకుండా రాష్ట్రంలో ప్రభుత్వం ఏర్పాటు చేయలేమని స్పష్టం చేశారు.
ప్రభుత్వ ఏర్పాటులో సేనతో చేతులు కలిపే విషయంలో వారి ఉద్దేశంపై కాంగ్రెస్-ఎన్సీపీ చేసిన బహిరంగ ప్రకటన ఇది. శివసేనకు కాంగ్రెస్ మద్దతు ఇస్తుందా అనే సందేహాలకు ఈ ప్రకటనతో ముగింపు పలికినట్లయింది.
రొటేషనల్ పద్ధతిలో..
మహారాష్ట్ర ముఖ్యమంత్రి పదవి రొటేషనల్ పద్ధతిలో ఉండనుందని ఎన్సీపీ వర్గాల సమాచారం. తొలి సగంలో శివసేన, రెండో అర్ధభాగం నేషనలిస్ట్ కాంగ్రెస్ పార్టీ అధికారం చేపట్టనున్నట్లు తెలుస్తోంది. పూర్తి ఐదేళ్ల కాలానికి ఉప ముఖ్యమంత్రి పదవిని కాంగ్రెస్ తీసుకోనున్నట్లు సమాచారం.
శివసేన నుంచే ముఖ్యమంత్రి..
మూడు పార్టీలు కలిసి ప్రభుత్వం ఏర్పాటు చేయాలనుకున్నప్పుడు ఆ ప్రక్రియ సుదీర్ఘంగా ఉంటుందన్నారు శివసేన నేత సంజయ్ రౌత్. ఈ కసరత్తును నేడు ప్రారంభించినట్లు తెలిపారు. 2-5 రోజుల్లో పూర్తి చేసుకుని రాష్ట్రంలో ప్రభుతాన్ని ఏర్పాటు చేస్తామన్నారు. శివసేన నుంచే ముఖ్యమంత్రి ఉండాలన్నది మహారాష్ట్ర ప్రజల ఆకాంక్ష అని తెలిపారు. ఉద్ధవ్ ఠాక్రే నేతృత్వంలో ప్రభుత్వం ఉండాలన్నేది అందరి భావనగా పేర్కొన్నారు.
ఇదీ చూడండి: చిట్ఫండ్ చట్ట సవరణ బిల్లుకు లోక్సభ ఆమోదం
