'అందుగలదని ఇందులేదని సందేహం వలదు, ఎందెందు వెతికినా అందందే కలదు' అన్నట్లు తయారైంది ప్లాస్టిక్. పర్యావరణాన్ని కలుషితం చేస్తూ.. మానవ మనుగడకే ప్రమాదంలోకి నెడుతోంది. ఈ క్రమంలో ఇలాంటి వాటికి చెక్ పెట్టాలనే చిన్ని ప్రయత్నంతో విజయం సాధించింది బెంగళూరు 'ప్లాస్టిక్ ఫర్ ఛేంజ్ ఇండియా ఫౌండేషన్'. ఆ స్వచ్ఛంద సంస్థకు చెందిన సభ్యులు.. ప్లాస్టిక్ వ్యర్థాలను సేకరించి, వాటి ద్వారా ఓ అందమైన పొదరిల్లును నిర్మించారు. మంగళూరులో ఉన్న ఈ గృహం ప్రేక్షకులను అమితంగా ఆకట్టుకుంటోంది.
పది రోజుల్లోనే..
చెత్త సేకరించే వారి నుంచి ప్లాస్టిక్ను సమీకరించారు ఫౌండేషన్ సభ్యులు. వాటిని కరిగించి రేకులుగా మార్చారు. ఇందుకుకోసం 1,500 కిలోల ప్లాస్టిక్ను ఉపయోగించారు. వీటితోనే హాల్, బెడ్ రూమ్, కిచెన్, బాత్రూమ్లను రూపొందించారు. ఈ ఇంటి పూర్తిస్థాయి నిర్మాణానికి 4.5 లక్షలు ఖర్చైందని చెప్పుకొచ్చారు ఫౌండేషన్ సభ్యులు. చూడ చక్కనైన ఈ నిర్మాణానికి పది రోజులే పట్టడం విశేషం.
పునాదులు పటిష్ఠంగా..
ఏ ఇంటి నిర్మాణానికి అయినా ముఖ్యమైనవి పునాదులు. అందుకే ఈ ఇంటి నిర్మాణం విషయంలో కూడా జాగ్రత్త తీసుకున్నారు పునాదిరాళ్లను సిమెంటుతో తయారు చేశారు. ప్లాస్టిక్ ప్యానెళ్లు మరింత దృఢంగా ఉండేందుకు.. వాటికి ఇనుప రాడ్లతో వెల్డింగ్ చేయించారట. ఈ ఇంటికి 30ఏళ్ల వరకు ఎలాంటి ఇబ్బంది లేదంటున్నారు ఫౌండేషన్ సభ్యులు. ఎటువంటి వాతావరణ పరిస్థితులనైనా తట్టుకోగలడం దీని ప్రత్యేకత.
చెత్త సేకరించే వారి నుంచి ప్లాస్టిక్ను సమీకరిస్తాం. ఇలా సేకరించిన మొత్తాన్ని హైదరాబాద్లోని బ్యాబూ హౌస్ వారు రీసైక్లింగ్ కోసం గుజరాత్కు పంపుతారు. రీసైక్లింగ్ అయిన తరువాత ప్లాస్టిక్ ప్యానెల్లు నిర్మాణానికి అనుకూలంగా వస్తాయి. వీటికి ఎలాంటి వాసనా ఉండదు. పైగా చాలా కాలం మన్నిక వస్తాయి.
- చందన్, ప్లాస్టిక్ ఫర్ చేంజ్ ఇండియా ఫౌండేషన్ డైరెక్టర్
ఫౌండేషన్ ధాతృత్వం
ఇలా ప్లాస్టిక్తో నిర్మించిన ఇంటిని కమలా అనే ఓ వృద్ధురాలికి ఉచితంగా ఇచ్చారు ఫౌండేషన్ సభ్యులు. వచ్చే ఏడాది జనవరిలోగా వ్యర్థాలను సేకరించే 20కుటుంబాలకు ప్లాస్టిక్ గృహాలను బహుమతిగా ఇవ్వాలని సంకల్పించుకున్నారు.
నా ఇల్లు రెండుసార్లు కూలిపోయింది. ప్లాస్టిక్ ఫర్ చేంజ్ ఇండియా ఫౌండేషన్ వాళ్లు నాకు అందమైన ఇంటిని నిర్మించి ఇచ్చారు. తొలుత వారు ప్లాస్టిక్తో ఇల్లు ఎలా నిర్మిస్తారోనని ఆశ్చర్యపోయాను. అచ్చం ఇటుక, సిమెంట్తో చేపట్టిన నిర్మాణంలాగే ఈ ఇల్లూ ఉంది.
- కమలా, లబ్ధిదారు
