దేశ సరిహద్దులను కంటికి రెప్పలా కాపాడే వీర జవాన్లకు శత్రు సైనికులు, ఉగ్రవాదుల తూటాల నుంచి రక్షణ లభించబోతోంది. అంతర్జాతీయ స్థాయిలో, కఠిన మార్గదర్శకాలకు అనుగుణంగా భారత ప్రమాణాల బ్యూరో (బీఐఎస్‌) రూపొందించిన బుల్లెట్‌ ప్రూఫ్‌ జాకెట్లు వారికి అందుబాటులోకి వస్తున్నాయి. వందకు పైగా దేశాల్లో ఆదరణ పొందిన ఈ కవచాలు అధునాతన తూటాల నుంచీ మన సైనికులను రక్షించనున్నాయి. అమెరికా, బ్రిటన్‌, జర్మనీ తర్వాత తూటా రక్షణ కవచాలకు సంబంధించి స్వీయ జాతీయ ప్రమాణాలను కలిగిన దేశంగా భారత్‌ అవతరించింది. దేశ రక్షణ బలగాల కోసం 1.86 లక్షల జాకెట్లు సరఫరా అయ్యాయి.
దుర్భేద్య రక్షణ
* ఏకే-47 తుపాకీ నుంచి సెకెనుకు 700 మీటర్ల వేగంతో దూసుకొచ్చే హార్డ్‌స్టీల్‌ కోర్‌ తూటాల నుంచి కూడా ఈ కవచాలు రక్షణ కల్పిస్తాయి. 360 డిగ్రీల్లో ఎక్కడి నుంచి తూటా దూసుకొచ్చినా సైనికుడికి ఏమీకాదు.
* వీటిలోని ‘డైనమిక్‌ వెయిట్‌ డిస్ట్రిబ్యూషన్‌’ వ్యవస్థ వల్ల 8 కిలోల జాకెట్‌ కూడా 4 కిలోల మాదిరిగా తేలికగా అనిపిస్తుంది. జాకెట్‌కు మంటలు అంటుకుంటే ఒక బటన్‌ నొక్కిన వెంటనే జాకెట్‌ మొత్తం విడిపోయే ఏర్పాట్లున్నాయి.
పనిచేసేదిలా..
* దూసుకొచ్చిన తూటా అంచు తొలుత జాకెట్‌లోని ముందు ప్లేట్లలో ఉన్న బోరాన్‌ కార్బైడ్‌లోకి వెళ్లి క్రమంగా నిర్వీర్యమవుతుంది. రెండో అంచెలో ఉన్న హైమాడ్యులస్‌ పాలీ ఇథలీన్‌ పొర దాని ప్రభావాన్ని పూర్తిగా నిలువరిస్తుంది.
ఏమిటీ హార్డ్‌ స్టీల్‌ తూటాలు?
* ఏకే-47 తుపాకుల్లో ఉపయోగించే సాధారణ తూటాల్లో సీసపు కోర్‌ భాగం, మైల్డ్‌ స్టీల్‌ కవర్‌ ఉంటాయి. మామూలు బుల్లెట్‌ ప్రూఫ్‌ జాకెట్లు వీటిని అడ్డుకుంటాయి. అయితే వీటిలోకి కూడా దూసుకెళ్లేలా హార్డ్‌ స్టీల్‌ తూటాలు (ఆర్మర్‌ పియర్సింగ్‌- ఏపీ) బుల్లెట్లు వచ్చాయి. కఠినమైన ఉక్కు లేదా టంగ్‌స్టన్‌ కార్బైడ్‌తో అవి తయారవుతున్నాయి. అధునాతన జాకెట్లు ప్రమాదకరమైన ఈ తూటాలనూ అడ్డుకుంటాయి.
ఇదీ చూడండి:పాక్ దుర్నీతి... నియంత్రణ రేఖ వెంట గ్రామాలపై దాడులు
