స్పైస్ జెట్ విమానాలు రెండింటికి గాలిలో ఉండగా సాంకేతిక సమస్య తలెత్తినట్లు సంస్థ అధికారులు తెలిపారు. వీటిలో ఒక విమానం ముంబయిలో, మరొకటి నాగ్పుర్ విమానాశ్రయంలో అత్యవసరంగా ల్యాండ్ అయినట్లు వెల్లడించారు.
పూర్తి వివరాల్లోకెళ్తే..
స్పైస్ జెట్కు చెందిన బోయింగ్ విమానం ఎస్జీ-611 ఈ రోజు ఉదయం 7:30 గంటల ప్రాంతంలో ముంబయి ఛత్రపతి శివాజీ మహారాజ్ విమానాశ్రయం నుంచి చెన్నై బయల్దేరింది. గాల్లోకి ఎగిరిన 16 నిమిషాలకు విమానంలో సాంకేతిక సమస్యను గుర్తించారు పైలట్లు. వెంటనే అప్రమత్తమై ముంబయి విమానాశ్రయ సిబ్బందితో మాట్లాడి అత్యవసరంగా ల్యాండ్ చేశారు.
ఇంజనీర్లు లోపాన్ని సరి చేశారని.. తిరిగి అదే విమానం ఉదయం 10 గంటలకు చెన్నై బయల్దేరినట్లు స్పైస్ జెట్ అధికారులు వెల్లడించారు.
బెంగళూరు నుంచి దిల్లీ బయల్దేరిన ఎస్జీ 8720 విమానం దారిలో ఉండగానే సాంకేతిక సమస్య తలెత్తింది. వెంటనే 'ఏటీసీ'తో చర్చించిన పైలట్లు.. నాగ్పుర్ విమానాశ్రయంలో విమానాన్ని అత్యవసరంగా దించారు.
నాగ్పుర్ నుంచి ప్రత్యేక విమానంలో ప్రయాణికులను దిల్లీకి తరలించామని స్పైస్ జెట్ తెలిపింది. ప్రయాణ సమయంలో రెండు బోయింగ్ 737 విమానాల్లో ఎంత మంది ఉన్నారనేది వెల్లడించలేదు.
