పాకిస్థానీ ఉగ్రమూకలే లక్ష్యంగా భారత సైన్యం చేసిన లక్షిత దాడులు ఇప్పటికీ పాక్ వాసుల గుండెల్లో రైళ్లు పరుగెత్తేలా చేస్తున్నాయి. అందుకే భారత వాయుసేన మరోమారు ఇలాంటి మెరుపు దాడులకు పాల్పడాలని ప్రయత్నిస్తోందంటూ తెగ ఆందోళన చెందుతున్నారు కొందరు. తాజాగా ఇదే అంశంపై ట్విట్టర్ వేదికగా భారత వాయుసేన (ఐఏఎఫ్)పై నిందలు మోపేందుకు ప్రయత్నించారు.
ఐఏఎఫ్కు చెందిన యుద్ధ విమానాలు కశ్మీర్లోని పాక్ భూభాగంలో చక్కర్లు కొట్టాయని.. ట్విట్టర్ వేదికగా తీవ్ర ఆరోపణలు చేశారు పలువురు పాక్ వాసులు. భారత వాయుసేన విమానాలను తాము ప్రత్యక్షంగా చూసినట్లూ.. నమ్మబలికారు.
"బహుశా కరాచీ చుట్టూ చాలా యుద్ధవిమానాలు తిరిగి ఉండొచ్చు. తర్వాతేంటి?" అని ఓ పాకిస్థానీ ట్వీట్ చేశాడు. మరొకరైతే "కరాచీ విమానాశ్రయం సమీపంలో ఐఏఎఫ్కు చెందిన యుద్ధ విమానాలను ప్రత్యక్షంగా చూశా" అని చెప్పుకొచ్చాడు. ఇంకొందరైతే " కూల్ సర్ప్రైజ్ ఇచ్చేందుకు పాకిస్థాన్ ఎయిర్ ఫోర్స్ సిద్ధంగా ఉంది" అంటూ ఏకంగా హెచ్చరిక ట్వీట్లు చేశారు.
కొందరు ట్విట్టర్ వినియోగదారులు.. భారత్-పాకిస్థాన్ సరిహద్దులో జరుగుతున్న పరిణామాలపై ఆందోళన వ్యక్తం చేశారు. "పాక్ గగనతలంలో భారత వాయుసేన విమానాలు తిరగలేదు. నిజానికి రాజస్థాన్ సరిహద్దులో పాక్ విమానాలే ఉల్లంఘనలకు పాల్పడుతున్నాయి" అని పాక్ వాసులకు గుర్తు చేశారు. మరికొందరైతే మిగ్ కమాండర్ వర్ధమాన్ అభినందన్ సంఘటననూ గుర్తు చేసుకున్నారు.
ఐఏఎఫ్ ఖండన
పాక్ వాసులు ట్విట్టర్ వేదికగా చేస్తున్న ఆరోపణలను తీవ్రంగా ఖండించాయి భారత వాయుసేన అధికారిక వర్గాలు. ఐఏఎఫ్కు చెందిన యుద్ధవిమానాలు పాక్ గగనతలంలో ఎలాంటి కార్యకలాపాలు చేపట్టలేదని స్పష్టం చేశాయి.
