ఒడిశాలో యాప్ ద్వారా కూరగాయలు విక్రయిస్తూ.. లాభాలు ఆర్జిస్తున్నారు గిరిజన మహిళా రైతులు.
లాక్డౌన్ వేళ కోరపుట్ జిల్లాలో గిరిజన మహిళలు సాగు చేసిన కూరగాయలను మార్కెట్కు తరలించడం కష్టంగా మారింది. అటు నగరాలు, పట్టణాల్లో కూరగాయలు దొరక్క ప్రజలు ఇబ్బందిపడ్డారు. అదే సమయంలో గలెగుడాకు చెందిన 'జయదుర్గా ప్రొడ్యూసర్స్ గ్రూప్' అనే గిరిజన మహిళా బృందానికి ఓ బాధ్యత అప్పజెప్పింది ఒడిశా గ్రామీణాభివృద్ధి మార్కెటింగ్ సంఘం. కంటెయిన్మెంట్ జోన్లలో.. కూరగాయలు విక్రయించాలని కోరింది.
మహిళా బృందం వారి బాధ్యతను నిర్వర్తించడానికి సఖా ఫౌండేషన్ అనే ఎన్జీఓ సహకారం కోరింది. రైతులు అడిగిందే ఆలస్యం రైతులకు, వినియోగదారులు సులభంగా ఉపయోగించగలిగే 'గ్రీన్ లైన్' మొబైల్ యాప్ను రూపొందించింది సఖా ఫౌండేషన్.
సులభమైన మార్గం...
ఈ 'గ్రీన్ లైన్' మొబైల్ యాప్ను వాట్సాప్ నుంచి వినియోగించుకునేలా రూపొందించారు. కూరగాయల ధరలు, ఇతర నిత్యావసర వస్తువుల వివరాలు ఈ యాప్లో ఉంటాయి. హోం డెలివరీ సదుపాయమూ కల్పించారు. దీంతో వినియోగదారులు ఇంట్లో కూర్చుని ఆర్డర్ చేస్తే తాజా కూరగాయలు వారి గుమ్మం వద్దకే చేరుతాయంటుున్నారు సఖా ఫౌండేషన్ డైరెక్టర్ జయంతి పద్మన్.
కంటెయిన్మెంట్ జోన్లలో కూరగాయలు సరఫరా చేసేందుకు మొదలైన ఈ వ్యాపారం ... లాక్డౌన్ నిబంధనలు ఎత్తివేశాక కూడా దిగ్విజయంగా కొనసాగుతోంది. గ్రీన్ లైన్కు అలవాటుపడిన వినియోగదారుల ఇప్పటికీ ఆర్డర్లు పెడుతున్నారని, దీంతో మహిళా రైతులు లాభపడుతున్నారని తెలిపారు ఒడిశా గ్రామీణాభివృద్ధి మార్కెటింగ్ సంఘం జిల్లా అధికారి.
ఇదీ చదవండి: డ్యూటీ కోసం ఇద్దరు మహిళల సాహసం
