ఇద్దరు తలారులను సమకూర్చాలని దిల్లీ తిహార్ జైలు అధికారులు ఉత్తర్ప్రదేశ్ ప్రభుత్వాన్ని కోరారు. ఈనెల 9న ఈ మేరకు ఫ్యాక్స్‌ ద్వారా సందేశం పంపారు. నిర్భయ దోషులకు త్వరలో ఉరిశిక్ష అమలు చేయనున్నారని జోరుగా ప్రచారం జరుగుతున్న నేపథ్యంలో తిహార్ జైలు అధికారుల అభ్యర్థన ప్రాధాన్యం సంతరించుకుంది.
తమ వద్ద ఇద్దరు తలారులు ఉన్నారని, తిహార్ జైలు అధికారులు కోరినప్పుడు పంపేందుకు సిద్ధమని యూపీ అదనపు డీజీపీ ఆనంద్‌కుమార్‌ తెలిపారు. ఉరితీయాల్సిన వారి వివరాలు వెల్లడించనప్పటికీ తమ జైల్లో ఉరిశిక్ష పడిన దోషులు ఉన్నారని, వారికి న్యాయపరంగా ఉన్న మార్గాలన్నీ మూసుకుపోయినట్లు తిహార్ జైలు అధికారులు తమ ఫ్యాక్స్‌ సందేశంలో పేర్కొన్నట్లు సమాచారం.
2012 డిసెంబర్‌ 16న నిర్భయ ఘటనలో మొత్తం ఆరుగురు దోషులు కాగా నలుగురికి సుప్రీంకోర్టు మరణశిక్ష విధించింది. వారిలో ఒకరు బాల నేరస్థుడు అయినందున పునరావాస కేంద్రానికి పంపారు. మరొక దోషి రాంసింగ్‌ జైల్లోనే ఆత్మహత్య చేసుకున్నాడు.
యూపీ జైళ్ల శాఖ పరిధిలో ఇద్దరు తలారులు ఉన్నారని వారిలో ఒకరు లఖ్‌నవూలో, మరొకరు మీరఠ్‌లో ఉన్నట్లు సమాచారం.
ఇదీ చూడండి: 'ఈశాన్య ప్రజల ప్రయోజనాలే భాజపాకు పరమావధి'
