పాకిస్థాన్ అదుపులోకి తీసుకున్న భారత హైకమిషన్ అధికారులను తీవ్రంగా హింసించినట్లు తెలుస్తోంది. యాక్సిడెంట్ చేసినట్లు అంగీకరించాలని వారిద్దరినీ ఒత్తిడి చేసినట్లు విశ్వసనీయవర్గాలు తెలిపాయి.
పాక్లోని భారత హైకమిషన్లో డ్రైవర్లుగా పనిచేస్తున్న ఇద్దరిని ఆదివారం ఉదయం 8.30 గంటల ప్రాంతంలో ఆయుధాలతో ఉన్న 16 మంది అదుపులోకి తీసుకున్నారు. ఈ ఘటన హైకమిషన్ సమీపంలోని పెట్రోల్ స్టేషన్ వద్ద జరిగింది. చేతులకు బేడీలు వేసి కళ్లకు గంతలు కట్టి గుర్తుతెలియని ప్రాంతానికి తీసుకెళ్లినట్లు తెలుస్తోంది.
"హైకమిషన్ అధికారులను యాక్సిడెంట్ చేసినట్లు అంగీకరించాలంటూ అపహరించినవారు ఒత్తిడి చేశారు. ఈ దృశ్యాలను చిత్రీకరించారు. హై కమిషన్‌లోని ఇంటెలిజెన్స్ అధికారులు బయటి నుంచి తమ కార్లలో ప్రజలను హైకమిషన్కు తీసుకురావాలని బలవంతం చేస్తున్నట్లు అంగీకరించాలని హింసించారు."
-అధికార వర్గాలు
మురికి నీరు తాగించి..
ఇలా 14 గంటల పాటు వీరిద్దరిని హింసించినట్లు తెలుస్తోంది. రాడ్లు, కర్రలతో కొట్టారని సమాచారం. పిడిగుద్దులు కురిపిస్తూ మురికినీరు తాగించి విచారించినట్లు అధికార వర్గాలు తెలిపాయి.
"హైకమిషన్లో కిందిస్థాయి నుంచి ఉన్నతాధికారుల వరకు ఎవరి పాత్ర ఏంటో చెప్పాలని డ్రైవర్లను అడిగారు. విచారణ సమయంలో మిగతా హైకమిషన్ అధికారులతోనూ ఇదే రకంగా వ్యవహరిస్తామని పదేపదే బెదిరించారు. అనంతరం వారిని వైద్య పరీక్షల కోసం పంపారు. అక్కడ టెటనస్ ఇన్జెక్షన్ ఇచ్చినట్లు చెప్పారు. 21 గంటల తర్వాత సోమవారం భారత హైకమిషన్కు తిరిగి అప్పగించారు."
- అధికార వర్గాలు
అయితే వాళ్లు నడవగలుగుతున్నా వారి ముఖాలు, మెడ, తొడలు, వీపు భాగంలో తీవ్రంగా కొట్టినట్లు గుర్తులు ఉన్నాయని సమాచారం. అయితే ప్రాణాంతకమైన గాయాలేమీ కాలేదని తెలుస్తోంది.
భారత్ హెచ్చరికతో..
అరెస్టయిన ఇద్దరు అధికారులను కారుతో సహా భారత హైకమిషన్ కార్యాలయంలో తక్షణమే అప్పగించాలని పాక్ దౌత్య అధికారికి భారత్ తేల్చి చెప్పినట్లు అధికారిక వర్గాలు వెల్లడించాయి.
అరెస్టయిన ఇద్దరు భారత అధికారులను విచారించవద్దని, వాళ్లను హింసించడానికి వీల్లేదని పాక్ దౌత్య అధికారికి జారీ చేసిన డీమార్చిలో పేర్కొంది భారత్. వారి భద్రతకు పాక్ అధికారులే బాధ్యత వహించాల్సి ఉంటుందని స్పష్టం చేసింది.
అప్పటి నుంచి..
భారత్లోని పాక్ హైకమిషన్ కార్యాలయంలో ఇద్దరు అధికారులు గూఢచర్యానికి పాల్పడుతున్నారని వారిని బహిష్కరించింది భారత్. సైన్యానికి సంబంధించిన కీలక సమాచారాన్ని వారు లీక్ చేస్తున్నారని చర్యలకు ఉపక్రమించింది.
ఈ ఘటన జరిగినప్పటి నుంచి ఇస్లామాబాద్లోని భారత హైకమిషన్ కార్యాలయంలోని అధికారులను వేధిస్తున్నాయి పాక్ సంస్థలు. భారత సీనియర్ దౌత్య వేత్త గౌరవ్ అహ్లువాలియా కారును ఆ దేశ నిఘా సంస్థ ఐఎస్ఐ సభ్యులు వెంబడించిన కొద్దిరోజుల అనంతరం ఈ పరిణామాలు జరగడం గమనార్హం.
ఇదీ చూడండి: పాక్కు భారత్ వార్నింగ్- ఇద్దరు అధికారులు విడుదల
