ఆమ్‌ ఆద్మీ పార్టీ 'అభివృద్ధి మాత్రమే' ఎజెండాను నీరు గార్చడానికి 'హిందూ వర్సెస్‌ ముస్లిం' అంశాన్ని భాజపా తెరపైకి తెస్తున్నట్లు శరవేగంగా గుర్తించిన అరవింద్‌ కేజ్రీవాల్ ప్రతిగా తెచ్చిన 'మితవాద హిందూత్వం' అద్భుత ఫలితాన్ని ఇచ్చింది. కమలనాథుల వ్యూహాన్ని తిప్పికొట్టడానికి బదులుగా ముల్లును ముల్లుతోనే ఎదుర్కోవాలన్న రీతిలో ఆయన అనుసరించిన ఈ వినూత్న పంథా ఓట్ల వర్షం కురిపించింది. తద్వారా భాజపా ప్రధానాస్త్రం నుంచి తాను లబ్ధి పొందారు. స్వీయ అభివృద్ధి ఎజెండాకు ఇది కూడా తోడు కావడం వల్ల తాజా అసెంబ్లీ ఎన్నికల్లో భారీ విజయాన్ని దక్కించుకున్నారు.
జై హనుమాన్‌!
దిల్లీ అసెంబ్లీ ఎన్నికలకు ముందు స్థానిక కన్నాట్‌ ప్లేస్‌లోని ప్రఖ్యాత హనుమాన్‌ ఆలయాన్ని కేజ్రీవాల్ సందర్శించారు. ఈ విషయంపై దిల్లీ భాజపా శాఖ అధ్యక్షుడు మనోజ్‌ తివారీ మండిపడ్డారు. కేజ్రీవాల్‌ను నకిలీ భక్తుడిగా అభివర్ణించారు. '‘ఆలయాన్ని సంప్రోక్షణ చేసి, నకిలీ భక్తుల వల్ల ఆలయ పవిత్రతకు చేకూరిన నష్టాన్ని సరిచేయాలని పూజారిని కోరినట్లు చెప్పారు. దిల్లీలోని హిందూ భక్తులకు తివారీ వ్యాఖ్యలు రుచించలేదు. ఒక టీవీ లైవ్‌ షోలో యాంకర్‌ విసిరిన సవాల్‌ను స్వీకరించిన కేజ్రీవాల్ ఎలాంటి తడబాటు లేకుండా హనుమాన్‌ చాలీసాను చక్కగా వల్లె వేసిన ఘటన వారి మనస్సుల్లో అప్పటికే బలంగా నాటుకుపోయింది.
ముస్లిం ఓట్లూ..
పౌరసత్వ సవరణ చట్టాని(సీఏఏ)కి వ్యతిరేకంగా షాహీన్‌బాగ్‌లో జరుగుతున్న నిరసన, దిగ్బంధం విషయంలో కేజ్రీవాల్ రాజకీయ విజ్ఞతను ప్రదర్శించారు. స్థూలంగా ఆ వివాదాస్పద అంశంపై విస్పష్ట వైఖరిని తీసుకోకుండా తెలివిగా నడుచుకున్నారు. ఇది ఆయనకు కలిసొచ్చినట్లు ఫలితాల సరళి చెబుతోంది. 13 శాతంగా ఉన్న ముస్లిం ఓట్లు దాదాపు గంపగుత్తగా ఆప్‌కు పడ్డాయని వెల్లడవుతోంది. షాహీన్‌బాగ్‌ అంశాన్ని గట్టిగా సమర్థించినప్పటికీ ఆ వర్గం ఓట్లు కాంగ్రెస్‌కు పోలేదు. కాంగ్రెస్‌ ఇప్పుడు పోరాడే పరిస్థితుల్లో లేదని, ఆప్ మాత్రమే భాజపాను ఢీ కొట్టగలదన్న నిర్ధారణకు వారు వచ్చినట్లు స్పష్టమవుతోంది.
షాహీన్‌బాగ్‌లో రోడ్లపై హిందూ ప్రయాణికుల రాకపోకలను ముస్లిం నిరసనకారులు అడ్డుకుంటున్నారని భాజపా విమర్శించింది. ఈ నేపథ్యంలో ఆందోళనలను ఆపాలని ఆప్ పిలుపునిచ్చింది.
అయోధ్యలో రామమందిరం నిర్మాణానికి ఒక ట్రస్టును ఏర్పాటు చేస్తున్నట్లు ఈ నెల 5న మోదీ సర్కారు చేసిన ప్రకటనను కూడా కేజ్రీవాల్ స్వాగతించారు. తద్వారా హిందువుల మనసును గెల్చుకున్నారు.
'హిందూ వ్యతిరేకి'ని కాదు..
తనను హిందూ వ్యతిరేకిగా చిత్రీకరించేందుకు భాజపా చేసిన ప్రయత్నాలను వమ్ము చేసేందుకు.. హిందువుల్లో వృద్ధులకు తన ప్రభుత్వం ఉచిత తీర్థయాత్ర సౌకర్యాన్ని కల్పించిన విషయాన్ని.. ప్రతి సభలోనూ కేజ్రీవాల్ ప్రముఖంగా ప్రస్తావించారు. 370 అధికరణం రద్దు విషయంలో తాము మోదీ సర్కారుకు మద్దతు పలికామని కూడా గుర్తు చేశారు. దిల్లీ ప్రభుత్వం చేపట్టిన యమునా ప్రక్షాళన కార్యక్రమాన్ని ప్రస్తావిస్తూ.. శ్రీకృష్ణుడికి ప్రీతిపాత్రమైన నదిగా అభివర్ణిస్తూ హిందువుల మనసు గెల్చుకునేందుకు ప్రయత్నించారు.
పెద్ద కుమారుడినా.. ఉగ్రవాదినా..
భాజపా ఎంపీ పర్వేశ్‌ వర్మ తనను ఉగ్రవాదిగా అభివర్ణించినప్పుడు కూడా కేజ్రీవాల్ తెలివిగా పరిస్థితిని ఎదుర్కొన్నారు. ఈ అంశంలో తనకు సానుభూతి వచ్చేలా చూసుకున్నారు. ‘‘గత ఐదేళ్లలో దిల్లీ ప్రజల కోసం అనేక సంక్షేమ పథకాలను ప్రవేశపెట్టా. అయినా భాజపా నేతలు నన్ను ఉగ్రవాదిగా అభివర్ణిస్తున్నారు. ఈ నేపథ్యంలో "నేను మీ పెద్ద కొడుకునా.. లేక ఉగ్రవాదినా అన్నది నిర్ణయించాలి" అంటూ దిల్లీ ప్రజల్లో భావోద్వేగాలను రగిలించారు.
