పబ్జీ ఆడుతూ గుండెపోటు వచ్చి మరణించాడు ఓ యువకుడు. ఈ ఘటన మధ్యప్రదేశ్లోని నీమచ్లో జరిగింది.
16 ఏళ్ల కిషోర్ రాజస్థాన్ అజ్మేర్ జిల్లా నసీరాబాద్ వాసి. బంధువు వివాహం కోసం మధ్యప్రదేశ్ వెళ్లాడు. అక్కడ 6 గంటలపాటు నిర్విరామంగా పబ్జీ ఆడిన అనంతరం ఒక్కసారిగా కుప్పకూలాడని కుటుంబ సభ్యులు తెలిపారు.
"6 గంటలపాటు పబ్జీ ఆడాడు. చెవుల్లో హెడ్సెట్ పెట్టుకుని 'అది పేల్చేయ్.. దీన్ని కాల్చు.. అలా చెయ్' ఇలా మాట్లాడుతూనే స్పృహ తప్పిపడిపోయాడు."
- కిషోర్ తండ్రి
కుటుంబ సభ్యులు వెంటనే ఆసుపత్రికి తీసుకెళ్లినా ఫలితం దక్కలేదు. కిషోర్ అప్పటికే మరణించాడని ప్రకటించారు వైద్యులు. ఇలాంటి గేమ్లు ఆడుతున్నప్పుడు ఓటమి భయంతో పిల్లలకు గుండెపోటు వచ్చే అవకాశముందని హెచ్చరించారు.
"అదే పనిగా గేమ్ ఆడుతుంటే స్పృహ తప్పిపడిపోయాడు. గుండెపోటు వచ్చింది. వెంటనే ఆసుపత్రికి తీసుకొచ్చారు. అప్పటికే పరిస్థితి చేయి దాటిపోయింది. బతికించేందుకు మేం చేసిన ప్రయత్నాలు ఫలించలేదు. ఈ గేమ్ ఎంతో ప్రమాదకరం. పిల్లలు దీనికి బానిసలు అవుతున్నారు. ఆంధ్రప్రదేశ్, కేరళ, హైదరాబాద్లో పబ్జీ కారణంగా పలువురు మరణించినట్టు వార్తల్లో విన్నాను. మీ పిల్లల్ని ఈ ఆట ఆడనివ్వకండి. చాటుగా ఆడకుండానూ వారిపై ఓ కన్నేసి ఉంచాలి. లేదంటే ఫలితాలు తీవ్రంగా ఉంటాయి."
-ఆశోక్ జైన్, వైద్యుడు
ఇదీ చూడండి: పదో తరగతి విద్యార్థి ప్రాణం తీసిన పబ్జి గేమ్
