దేశంలో కొవిడ్-19 ఉద్ధృతి కొనసాగుతోంది. మహారాష్ట్ర, తమిళనాడు సహా పలు రాష్ట్రాలపై పంజా విసురుతోంది. రోజురోజుకు కొత్త కేసుల నమోదులో సరికొత్త రికార్డులు నమోదవుతున్నాయి. దేశవ్యాప్తంగా మొత్తం కేసుల సంఖ్య 5.60 లక్షలు దాటింది, దాదాపు 17వేల మంది మరణించారు.
మహా విజృంభణ..
మహారాష్ట్రలో కరోనా వైరస్ కరాళ నృత్యం చేస్తోంది. మంగళవారం ఒక్కరోజే 4,878 కొత్త కేసులు నమోదయ్యాయి. మరో 245 మంది ప్రాణాలు కోల్పోయారు. రాష్ట్రవ్యాప్తంగా మొత్తం కేసుల సంఖ్య 1,74,761కి చేరింది. అందులో ప్రస్తుతం 75,979 మంది చికిత్స పొందుతున్నారు. 90,911 మంది వైరస్ నుంచి కోలుకున్నారు. రాష్ట్రంలో రికవరీ రేటు 52.02 శాతంగా ఉన్నట్లు ఆరోగ్య శాఖ వెల్లడించింది.
తమిళనాడులో..
తమిళనాడులో కరోనా ఉద్ధృతి కొనసాగుతోంది. రోజురోజుకు కొత్త కేసులు గణనీయంగా పెరుగుతున్నాయి. మంగళవారం ఒక్కరోజే 3,943 మందికి కరోనా నిర్ధరణ అయింది. మరో 60 మంది ప్రాణాలు కోల్పోయారు. రాష్ట్రంలో మొత్తం కేసుల సంఖ్య 90,167కు, మరణాల సంఖ్య 1,201కు చేరింది. 50,074 మంది కోలుకోగా, 38,889 మంది చికిత్స పొందుతున్నారు.
మంత్రికి కరోనా..
తమిళనాడు రాష్ట్ర ఉన్నత విద్యాశాఖ మంత్రి కేపీ అంబళగన్కు కరోనా పాజిటివ్గా తేలింది. సోమవారం దగ్గుతో చెన్నైలోని ఓ ప్రైవేటు ఆస్పత్రిలో చేరారు మంత్రి. అయితే.. ఆయనకు ముందుగా ఎలాంటి లక్షణాలు కనిపించలేదని, సిటీ స్కాన్లోనూ సాధారణంగానే వచ్చినట్లు వైద్యులు తెలిపారు. అయితే.. రెండోసారి నమూనాలను పరీక్షించగా పాజిటివ్గా తేలినట్లు చెప్పారు. ప్రస్తుతం ఆయన ఆరోగ్యం నిలకడగానే ఉందని స్పష్టం చేశారు.
గుజరాత్లో..
గుజరాత్లో మంగళవారం మరో 620 కరోనా పాజిటివ్ కేసులు నమోదయ్యాయి. 20మంది ప్రాణాలు కోల్పోయారు. రాష్ట్రవ్యాప్తంగా మొత్తం కేసులు సంఖ్య 32,446కు చేరగా.. 23,670 మంది కోలుకుని ఇళ్లకు వెళ్లినట్లు అధికారులు తెలిపారు. మొత్తం మృతుల సంఖ్య 1,848కి చేరింది.
బంగాల్లో...
పశ్చిమ బంగాలో మంగళవారం 652మందికి కరోనా పాజిటివ్గా తేలింది. మరో 15 మంది మరణించారు. రాష్ట్రవ్యాప్తంగా మొత్తం కేసులు 18,559, మరణాలు 668కి చేరాయి. ఇప్పటి వరకు 12,130 మంది వైరస్ నుంచి కోలుకున్నారు. 5,761 మంది చికిత్స పొందుతున్నారు. రికవరీ రేటు 65.35 శాతంగా ఉన్నట్లు అధికారులు వెల్లడించారు.
రాజస్థాన్లో..
రాజస్థాన్లో వైరస్ వేగంగా విస్తరిస్తోంది. మంగళవారం కొత్తంగా 354 మందికి పాజిటివ్గా తేలింది. 8మంది ప్రాణాలు కోల్పోయారు. మొత్తం కేసుల సంఖ్య 18,014, 413 మరణాలు సంభవించాయి.
హిమాచల్ప్రదేశ్లో..
హిమాచల్ప్రదేశ్లో కరోనా పంజా విసురుతోంది. మంగళవారం 338 కొత్త కేసులు బయటపడ్డాయి. నలుగురు మృతి చెందారు. మొత్తం కేసుల సంఖ్య 14548కి చేరగా.. మృతుల సంఖ్య 236కు చేరింది.
పంజాబ్లో..
పంజాబ్లో మంగళవారం 150 కొత్త కేసులు బయటపడ్డాయి. ఆరుగురు మృతి చెందారు. మొత్తం కేసులు సంఖ్య 5568, మరణాలు 144కు చేరాయి.
జమ్ముకశ్మీర్లో...
జమ్ముకశ్మీర్లో వైరస్ వేగంగా వ్యాప్తి చెందుతోంది. కొత్తగా 260 మందికి వైరస్ పాజిటివ్గా నిర్ధరణ అయింది. జమ్ము డివిజన్లో 32, కశ్మీర్ డివిజన్లో 228 వచ్చాయి. మొత్తం కేసుల సంఖ్య 7497కు చేరగా ప్రస్తుతం 4722 మంది కోలుకున్నారు. మరో 2674 మంది చికిత్స పొందుతున్నారు.
ఝార్ఖండ్లో..
ఝార్ఖండ్లో నేడు 60 కొత్త కేసులు నమోదయ్యాయి. మొత్తం కేసుల సంఖ్య 2490కి చేరింది. 1884 మంది కోలుకున్నారు. 15 మంది మృతి చెందారు.
గోవాలో...
గోవాలో ఇవాళ కొత్తగా 64 మందికి వైరస్ సోకింది. రాష్ట్రవ్యాప్తంగా మొత్తం కేసులు 1315కు చేరాయి. ఇప్పటి వరకు 596 మంది కోలుకున్నారు. ముగ్గురు ప్రాణాలు కోల్పోయారు.
ఇదీ చూడండి: 'పెట్టుబడుల పేరుతో 'చైనా దొంగాట'పై దర్యాప్తు!'
