కరోనా మహమ్మారిని అంతం చేయడానికి పరిశోధకులు సూపర్ కంప్యూటర్లనూ వినియోగిస్తున్నారు. వైరస్‌ని నివారించే కొత్త యాంటీ వైరల్‌ని గుర్తించేందుకు వీలుగా ఔషధాల డేటాబేస్‌ని, వివిధ దశల్లో ఉన్న పరిశోధనల సమాచారాన్ని వడపోస్తున్నారు. సాధారణ కంప్యూటర్లతో నెలల కాలం పట్టే ఈ పని.. సూపర్ కంప్యూటర్లతో వారాల్లోనే పూర్తికానుంది. అమెరికాలోని ఓక్రిడ్జ్‌ నేషనల్‌ ల్యాబ్‌లోని ‘సమ్మిట్‌’.. ప్రపంచంలోనే శక్తిమంతమైన సూపర్‌కంప్యూటర్‌. దీంతోపాటు జర్మనీలోని సూపర్ ఎంసీయూ-ఎన్‌జీ సూపర్‌కంప్యూటర్‌ని ఈ సమాచార శోధనలో వినియోగిస్తున్నారు.
యూరోపియన్‌ యూనియన్‌లో అతిపెద్ద పరిశోధన, ఆవిష్కరణ కార్యక్రమం ‘హారిజన్‌ 2020’. ఇందులోని జీవ ఔషధ గణన కేంద్రం అధినేత పీటర్‌ కొవిని, అమెరికా, యూరప్‌లకు చెందిన వంద మందికిపైగా పరిశోధకులు ఉమ్మడిగా ఈ కృషి చేస్తున్నారు.
