నేటి విద్యార్థులు పోటీ పరీక్షలకు సన్నద్ధమవడానికి... ప్రైవేటు శిక్షణ తరగతుల కంటే ఆన్లైన్లో పాఠాలు వినడానికే అధిక ప్రాధాన్యత ఇస్తున్నారని తాజాగా చేపట్టిన ఓ సర్వేలో వెల్లడైంది.
'గ్రేడ్ అప్' అనే సాంకేతిక విద్యా వేదిక నిర్వహించిన సర్వేలో ఈ విషయాలు వెల్లడయ్యాయి. మూడు నెలల్లో జేఈఈ, నీట్, గేట్, ఎస్ఎస్సీ, బ్యాంకింగ్ పరీక్షల కోసం సన్నద్ధమవుతున్న సుమారు పదివేల మంది విద్యార్థులపై ఈ సర్వే నిర్వహించింది.
ఆన్లైన్ వైపే మొగ్గు..
ఈ సర్వేలో 90 శాతం మంది విద్యార్థులు ఆఫ్లైన్ కోచింగ్ కంటే ఆన్లైన్ కోచింగ్ వైపే మొగ్గుచూపారని ఈ సర్వే స్పష్టం చేసింది.
ఎక్కువ మంది లైవ్ తరగతులను ఎంచుకోవడానికి ప్రధాన కారణం.. అధ్యాపకులతో నేరుగా ఇంటరాక్ట్ అయ్యి తమకు వచ్చిన సందేహాలను తక్షణమే నెరవేర్చుకునే అవకాశం. రోజువారి పాఠ్యప్రణాళికను పక్కాగా పూర్తి చేసుకునే సదుపాయం కలిగి ఉండటం.
ఆన్లైన్ కోచింగ్ను ఇష్టపడే 90 శాతం మందిలో ఉత్తరప్రదేశ్ విద్యార్థులు ముందు వరుసలో ఉండగా, తరువాతి స్థానాల్లో ఆంధ్రప్రదేశ్, తెలంగాణ విద్యార్థులు ఉన్నారు.
అదనంగా చెల్లించడానికి సిద్ధం..
63 శాతం విద్యార్థులు ప్రత్యక్ష (లైవ్) తరగతులను ఎంచుకుంటున్నారు. 29 శాతం మంది మాత్రమే రికార్డ్ చేసిన ఆన్లైన్ పాఠాలను వినడానికి ఇష్టపడుతున్నారు.
సర్వేలో పాల్గొన్న 20 శాతం మంది విద్యార్థులు ఆన్లైన్ పాఠాలు వినడానికి అదనంగా ఫీజులు చెల్లించడానికి సైతం సిద్ధపడుతున్నట్లు తెలిపారు. ఆన్లైన్ తరగతుల కోసం నమోదు చేసుకున్న విద్యార్థుల సంఖ్య ఈ విషయాన్ని ధ్రువపరుస్తోందని సర్వే నివేదిక చెబుతోంది.
ఇదీ చూడండి: పంట బీమా కచ్చితమా.. ఐచ్ఛికమా..?
