సార్వత్రిక ఎన్నికల్లో విజయమే లక్ష్యంగా ఉత్తర్ప్రదేశ్లో సమాజ్వాదీ పార్టీ పావులు కదుపుతోంది. తాజాగా నిషాద్, జనవాదీ (సోషలిస్ట్), రాష్ట్రీయ సమంత దళ్ పార్టీలతో పొత్తు కుదుర్చుకుంది.
ఇప్పటికే మాయావతి నేతృత్వంలోని బహుజన్ సమాజ్ పార్టీ (బీఎస్పీ), అజిత్ సింగ్ ఆధ్వర్యంలోని 'రాష్ట్రీయ లోక్ దళ్' (ఆర్ఎల్డీ)తో ఎస్పీ కూటమి ఏర్పాటు చేసింది.
ఉత్తరప్రదేశ్లో 80 లోక్సభ స్థానాలు ఉన్నాయి. ఈ సార్వత్రిక ఎన్నికల్లో అధికార భాజపా ఓటమే లక్ష్యంగా ఉత్తరప్రదేశ్లోని ప్రతిపక్ష పార్టీలన్నీ ఐక్యమయ్యాయి. కాంగ్రెస్ మాత్రం ఒంటరి పోరుకు సిద్ధమైంది.
భాజపా అధికార దుర్వినియోగానికి పాల్పడుతోంది
అధికార భాజపా ప్రభుత్వం అధికార దుర్వినియోగానికి పాల్పడుతోందని సమాజ్వాదీ పార్టీ అధ్యక్షుడు అఖిలేశ్ యాదవ్ ఆరోపించారు. గవర్నర్, ప్రభుత్వ సంస్థలు, ప్రసార మాధ్యమాలను అక్రమంగా భాజపా ప్రచారానికి వాడుకుంటోందని అఖిలేశ్ విమర్శించారు. ఇటీవల రాజస్థాన్ గవర్నర్ కల్యాణ్ సింగ్, నరేంద్ర మోదీ మళ్లీ ప్రధాని కావాలని ఆకాంక్షించడాన్ని అఖిలేశ్ గుర్తుచేశారు. త్వరలోనే ఉమ్మడి మేనిఫెస్టో (ఎన్నికల ప్రణాళిక) విడుదల చేస్తామని అఖిలేశ్ తెలిపారు.
"ఈ లోక్సభ ఎన్నికలు ప్రధానంగా ప్రతిపక్షాలకు, చౌకీదార్ (మోదీ)కి మధ్య జరుగుతున్నాయి. భాజపా ప్రచారకులు ఎవరంటే గవర్నర్, ప్రభుత్వ సంస్థలు, ప్రసార మాధ్యమాలు."-అఖిలేశ్ యాదవ్, సమాజ్వాదీ పార్టీ అధ్యక్షుడు
