'శివసేనకు 170 మంది ఎమ్మెల్యేల మద్దతు ఉంది'

మహారాష్ట్ర ముఖ్యమంత్రి పీఠంపై భాజపా- శివసేన మధ్య విభేదాలు కొనసాగుతున్న వేళ.. సేన ఎంపీ సంచలన వ్యాఖ్యలు చేశారు. శివసేనకు 170 మంది ఎమ్మెల్యేలు ఉన్నారని, ఈ సంఖ్య 175కు కూడా పెరిగే అవకాశముందని ప్రకటించారు. మిత్రపక్షం భాజపాపైనా.. రౌత్​ తీవ్ర ఆరోపణలు చేశారు.

శివసేన నేత సంజయ్ రౌత్ సంచలన వ్యాఖ్యలు చేశారు. తమ పార్టీకి 170 మంది ఎమ్మెల్యేల మద్దతు ఉందని ఆయన వెల్లడించారు. ఈ సంఖ్య 175కు కూడా చేరే అవకాశం ఉందని అభిప్రాయపడ్డారు. మహారాష్ట్రలో ప్రభుత్వ ఏర్పాటుపై భాజపా-శివసేన మధ్య విభేదాలు ఏర్పడిన నేపథ్యంలో సంజయ్ రౌత్​ వ్యాఖ్యలు సర్వత్రా ఆసక్తి రేకెత్తిస్తున్నాయి.

అహంకారం అనే బురదలో

సంజయ్​ రౌత్ భాజపాపై పరోక్ష విమర్శలు చేశారు. మహారాష్ట్రలో ప్రభుత్వ ఏర్పాటు అనే రథం ' (భాజపా)అహంకారం అనే బురద'లో చిక్కుకుందని ఆయన విమర్శించారు.
మహారాష్ట్రలో రాష్ట్రపతి పాలన విధించవచ్చన్న భాజపా నేతల వ్యాఖ్యలపైనా సంజయ్​ రౌత్​ మండిపడ్డారు. ఈ విషయంపై శివసేన పత్రిక సామ్నాలో 'రాష్ట్రపతిపాలనకు భాజపా సిద్ధపడడం అంటే అది ఆ పార్టీకి ఈ దశాబ్దంలోనే పెద్ద ఓటమి అవుతుంది' అని వ్యాఖ్యానించారు.

ముఖ్యమంత్రి పీఠం కోసం

మహారాష్ట్ర అసెంబ్లీ ఎన్నికల్లో భాజపా-శివసేన కూటమి ప్రభుత్వ ఏర్పాటుకు అవసరమైన సీట్లలో విజయం సాధించింది. అయితే ముఖ్యమంత్రి పీఠం విషయంలో ఇరుపార్టీల మధ్య భేదాభిప్రాయాలు పొడచూపాయి. ఫలితంగా రాష్ట్రంలో ఇప్పటి వరకు ప్రభుత్వం ఏర్పడలేదు.

ఇదీ చూడండి: '5 ట్రిలియన్​ డాలర్ల భారత్​ కల తొందరలోనే సాకారం'