వివాదాస్పద బిల్లులు... విపక్షాల నిరసనలు... అవిశ్వాస తీర్మానం-సస్పెన్షన్-బాయ్కాట్... వర్షాకాల సమావేశాల్లో రాజ్యసభ సాగిన తీరు ఇది. రాజకీయంగా పెను దుమారానికి వేదికైన ఈ సమావేశాలు... చరిత్రలోనే రెండో అత్యల్ప సమయం సాగిన వర్షాకాల సెషన్గా రికార్డు సృష్టించింది.
- ఇప్పటివరకు జరిగిన మొత్తం 252 పార్లమెంటు సమావేశాల్లో ఇది 3వ అత్యల్ప సమయం సాగిన సెషన్.
- ఇప్పటివరకు 89వ సెషన్ 40 సిట్టింగ్లతో అతిపెద్ద వర్షాకాల సమావేశాలుగా నిలిచింది.
- ప్రస్తుత 252వ సెషన్ బుధవారం నిరవధిక వాయిదా పడింది. ఈ వర్షాకాల సమావేశాల్లో కేవలం 10 సిట్టింగులు మాత్రమే జరిగాయి. 1952 నుంచి ఇప్పటివరకు నిర్వహించిన మొత్తం 69 వర్షాకాల సమావేశాల్లో అతి తక్కువ సిట్టింగ్ల పరంగా రెండవ స్థానంలో నిలిచింది.
- 1979 జులైలో నిర్వహించిన 110వ వర్షాకాల సమావేశాలు, 1999 అక్టోబర్లో నిర్వహించిన 187వ సమావేశాలు కేవలం 6 సిట్టింగ్లతో జాబితాలో అగ్రస్థానంలో ఉన్నాయి.
- అత్యధిక కాలం జరిగిన పార్లమెంట్ వర్షాకాల సమావేశాలుగా రికార్డు సృష్టించిన 89వ సెషన్.. 1974లో నిర్వహించారు. మొత్తం 40 సిట్టింగ్లతో అతిపెద్ద వర్షాకాల సెషన్గా నిలిచింది.
- ఇప్పటివరకు జరిగిన 69 వర్షాకాల సమావేశాల్లో.. ప్రస్తుత సెషన్తో కలిపి 3 సెషన్లు 10 కంటే తక్కువ సిట్టింగ్లతో జరిగాయి. 16 సెషన్లు 11 నుంచి 20 సిట్టింగ్ల మధ్య జరగగా.. 40 సెషన్లు ఒక్కోటి 21 నుంచి 30 మధ్య నిర్వహించారు. ఇక 9 సమావేశాలు 31 నుంచి 39 సిట్టింగ్లతో చేపట్టారు. ఒకే సెషన్ 40 సిట్టింగ్లతో జరిగింది.
- ప్రస్తుత వర్షాకాల సమావేశాలు ప్రణాళిక ప్రకారం సెప్టెంబర్ 14 నుంచి అక్టోబర్ 1 మధ్య 18 సిట్టింగ్లతో జరగాలి. కానీ సెప్టెంబర్ 23నే నిరవధిక వాయిదా పడింది. 1976లో జరిగిన 76వ వర్షాకాల సమావేశాలు 18 సెషన్లతోనే నిర్వహించారు. మరో 6 సెషన్లూ 16 నుంచి 17 సిట్టింగ్లతోనే ముగిశాయి.
- మొత్తం 69 వర్షాకాల సమావేశాల్లో 34 సెషన్లు జులై-ఆగస్టు మధ్యే నిర్వహించారు. ఆగస్టు-సెప్టెంబర్ మధ్య 16, జులై-సెప్టెంబర్ మధ్య 6 నడిచాయి. ఆగస్టు-అక్టోబర్ మధ్య మరో 5 సెషన్లు నిర్వహించారు. 187వ పార్లమెంట్ సమవేశాలనే కేవలం 6 సిట్టింగ్లతో పూర్తిగా అక్టోబర్లోని నిర్వహించారు. నాడు అటల్ బిహారీ వాజ్పేయీ మూడవ సారి ప్రధాని అయ్యాక ఈ సమవేశాలు జరిగాయి.
- మొత్తంగా రాజ్యసభలో నిర్వహించిన మొత్తం 252 సెషన్లలో.. 1979 ఆగస్టు 20న నిర్వహించిన 111వ సెషన్ ఒకే సిట్టింగ్తో అతి తక్కువ సమయం నిర్వహించిన సెషన్గా చరిత్ర పుటలకెక్కింది. ఈ సమావేశాలప్పుడే నాటి ప్రధాని చరణ్ సింగ్ రాజీనామా చేశారు.
