కాంగ్రెస్ పార్టీకి జ్యోతిరాధిత్య సింధియా రాజీనామా చేయడం మధ్యప్రదేశ్ రాజకీయాల్లో సంచలనం సృష్టించింది. సింధియా 18 ఏళ్ల పాటు కాంగ్రెస్ పార్టీలో కీలక నేతగా ఉన్నారు. అనేక పదవులు నిర్వహించారు. పార్టీ అగ్రనేత రాహుల్ గాంధీకి సన్నిహితుడు. గతేడాది జరిగిన మధ్యప్రదేశ్ ఎన్నికల్లో పార్టీని అధికారంలోకి తెచ్చేందుకు కీలకంగా వ్యవహరించారు. అలాంటి నాయకుడు దూరం కావడం కాంగ్రెస్కు పెద్ద దెబ్బే అనే అభిప్రాయం వ్యక్తమవుతోంది.
అసంతృప్తులు చాలానే...
కాంగ్రెస్లో ఇంతగా వెలుగొందిన సింధియా రాజీనామా వెనుక చాలా అంశాలే ఉన్నాయని రాజకీయ విశ్లేషకులు భావిస్తున్నారు. మధ్యప్రదేశ్లో పార్టీ కార్యకలాపాల్లో ప్రాధాన్యం ఇవ్వకపోవటం పట్ల కాంగ్రెస్ అధిష్ఠానంపై సింధియా వర్గం ఎమ్మెల్యేలు చాలా రోజుల నుంచి అసంతృప్తితో ఉన్నట్లు సమాచారం.
సీఎం పదవి..
2018నాటి అసెంబ్లీ ఎన్నికల్లో కాంగ్రెస్ ప్రచార బాధ్యతలు భుజానికెత్తుకుని పార్టీకి అధికారాన్ని కట్టబెట్టిన సింధియాకు ముఖ్యమంత్రి పదవి దక్కలేదు. అప్పటి నుంచి పార్టీపై గుర్రుగా ఉన్న ఆయన పలుసార్లు బహిరంగంగానే తన అసంతృప్తిని వ్యక్తం చేశారు.
సింధియాను రాజ్యసభకు పంపాలని ఆయన వర్గం చాలా రోజుల నుంచి పట్టుబడుతోంది. అయితే ఆయన స్థానంలో ప్రియాంక గాంధీని నామినేట్‌ చేయాలని పార్టీలోని మరో వర్గం డిమాండ్‌ చేస్తోంది. సింధియా కుటుంబానికి భాజపాతోనూ సన్నిహిత సంబంధాలు ఉండటమూ మరో కారణంగా వినిపిస్తోంది.
బుజ్జగించినా..
సింధియాతో రాజీ కోసం కాంగ్రెస్ అనేక ప్రయత్నాలు చేసినా ఫలితం దక్కలేదు. అసంతృప్తి ఎమ్మెల్యేలను బుజ్జగించేందుకు వీలుగా మంత్రివర్గ పునర్‌వ్యవస్థీకరణ చేయాలని సీఎం కమల్నాథ్ నిర్ణయించారు. ఇందుకోసం దాదాపు 20 మంది మంత్రులు తమ పదవులను త్యాగం చేశారు. అయినప్పటికీ సింధియా వర్గం వెనక్కు తగ్గలేదు.
భాజపా వైపు అడుగులు!
మధ్యప్రదేశ్లో ప్రభుత్వాన్ని కూల్చేందుకు భాజపాతో సింధియా కలుస్తారన్న వార్తల నడుమ ఈ పరిణామం చోటుచేసుకుంది. ప్రధాని నరేంద్ర మోదీ, కేంద్ర హోంమంత్రి అమిత్ షాతో ఉదయం దిల్లీలో ఇదే అంశంపై చర్చలు జరిగినట్లు సమాచారం. భాజపాలో సింధియా చేరితే కమల్నాథ్ ప్రభుత్వం కష్టాల్లో పడినట్లేనని పలువురు భావిస్తున్నారు.
