కశ్మీర్​లో '4జీ'కి సుప్రీం నో... కమిటీ ఏర్పాటు

జమ్ము కశ్మీర్​లో 4జీ సేవల పునరుద్ధరణకు సుప్రీంకోర్టు అనుమతి నిరాకరించింది. అయితే ఈ విషయంపై అధ్యయనం చేసేందుకు ఓ హైపవర్ కమిటీ ఏర్పాటు చేయాలని ఆదేశాలు జారీచేసింది. జాతీయ భద్రత, మానవ హక్కుల మధ్య సమతుల్యత పాటించాల్సిన అవసరముందని అభిప్రాయపడింది.

జమ్ముకశ్మీర్​లో 4జీ అంతర్జాల సేవలు పునరుద్ధరించాలంటూ దాఖలైన పిటిషన్లపై సుప్రీంకోర్టు కీలక ఆదేశాలు జారీ చేసింది. ఈ వ్యవహారానికి సంబంధించిన అన్ని అంశాలను పరిశీలించి, నిర్ణయం తీసుకునేందుకు కేంద్ర హోంశాఖ కార్యదర్శి నేతృత్వంలో ఓ హైపవర్ కమిటీ ఏర్పాటు చేయాలని సూచించింది.​ ఈ కమిటీలో జమ్ము కశ్మీర్​ ప్రధాన కార్యదర్శి, సమాచార మంత్రిత్వశాఖ కార్యదర్శి కూడా ఉంటారని ధర్మాసనం స్పష్టం చేసింది.

జాతీయ భద్రత ముఖ్యం

జమ్ముకశ్మీర్​లో 4జీ సేవలు పునరుద్ధరించాలని... ఫౌండేషన్ ఫర్ మీడియా ప్రొఫెషనల్స్, షోయబ్​ ఖురేషి, జమ్ము కశ్మీర్ ప్రైవేట్ పాఠశాలల సంఘం దాఖలు చేసిన పిటిషిన్లపై సర్వోన్నత న్యాయస్థానం నేడు విచారణ చేపట్టింది. జస్టిస్​ ఎన్​.వి.రమణ, జస్టిస్ ఆర్​.సుభాష్​రెడ్డి, జస్టిస్​ బి.ఆర్.గవాయ్​ల త్రిసభ్య ధర్మాసనం... జమ్ము కశ్మీర్​లో 4జీ అంతర్జాల సేవలు పునరుద్ధరించేందుకు అనుమతి నిరాకరించింది. జాతీయ భద్రత, మానవ హక్కుల మధ్య సమతుల్యత ఉండాలని స్పష్టం చేసింది.

ఇదీ చూడండి: భారత్​లో కరోనా కొత్త రికార్డ్- ఒకేరోజు 4,213 కేసులు