'దేశాన్ని మొదటగా విభజించాలన్నది సావర్కరే'

ఛత్తీస్​గఢ్​​ ముఖ్యమంత్రి భూపేశ్​ బఘేల్ వివాదాస్పద వ్యాఖ్యలు చేశారు. స్వాతంత్ర్యానికి ముందు దేశ విభజనకు బీజం వేసింది హిందూ మహాసభ నేత వినాయక్​ దామోదర్ సావర్కరేనని ఆరోపించారు. రాయ్​పుర్​లో కాంగ్రెస్​ పార్టీ కార్యకర్తల సమావేశంలో ఈ వ్యాఖ్యలు చేశారు బఘేల్.

దేశాన్ని రెండుగా విభజించాలనే ఆలోచనకు బీజం వేసింది హిందూ మహాసభ నేత వినాయక్​ దామోదర్​ సావర్కరేనని వివాదాస్పద వ్యాఖ్యలు చేశారు ఛత్తీస్​గఢ్ ముఖ్యమంత్రి, కాంగ్రెస్​ నేత భూపేశ్​ బఘేల్​. దేశ తొలి ప్రధాని పండిట్​ జవహర్​ లాల్​ నెహ్రూ 55వ వర్థంతి సందర్భంగా రాయ్​పుర్​లో ఏర్పాటు చేసిన కాంగ్రెస్​ కార్యకర్తల సమావేశంలో ఈ వ్యాఖ్యలు చేశారు.

" స్వాతంత్ర్యంతో పాటు దేశ విభజన జరిగింది. మహ్మద్ అలీ జిన్నా దేశాన్ని విడగొట్టారు. అంతకు ముందు 16 సంవత్సరాల క్రితమే ​ హిందువులు, ముస్లింలకు వేర్వేరు దేశాలు ఉండాలని వినాయక్ దామోదర్ సావర్కర్ కాంక్షించారు. దేశ విభజన ఆలోచన సావర్కర్​ది. దాన్ని అమలు చేసింది జిన్నా."
-భూపేశ్ బఘేల్, ఛత్తీస్​గఢ్​ ముఖ్యమంత్రి

అణు ప్రయోగాలు, అంతరిక్ష పరిశోధనలు, ప్రపంచం శ్రేణి ప్రభుత్వ సంస్థలు నెలకొల్పి దేశ నిర్మాణంలో నెహ్రూ కీలక భూమిక పోషించారన్నారు బఘేల్. ప్రస్తుతం ఆయన ఆలోచనలను నీరు గార్చే ప్రయత్నాలు జరుగుతున్నాయని ఆరోపించారు.

భాజాపా ఖండన

సావర్కర్​పై బఘేల్ వ్యాఖ్యలను ఖండించారు ఛత్తీస్​గఢ్​ మాజీ ముఖ్యమంత్రి, భాజపా ఉపాధ్యక్షుడు రమణ్​ సింగ్​. చరిత్రపై సరైన అవగాహన లేకుండా మాట్లాడటం సరికాదని బదులిచ్చారు. దేశ విభజనపై ఇప్పుడు చర్చించాల్సిన అవసరం లేదన్నారు రమణ్​ సింగ్​.

ఇదీ చూడండి: 'అయోధ్యలో రామమందిర నిర్మాణం జరుగుతుంది'