'పౌర' బిల్లు ఆమోదంపై సర్కారు హర్షం.. కాంగ్రెస్​ గరం

పౌరసత్వ సవరణ బిల్లు ఆమోదంపై ప్రధాని నరేంద్ర మోదీ హర్షం వ్యక్తం చేశారు. దేశ చరిత్రలో ఇది సువర్ణాక్షరాలతో లిఖించదగ్గదిగా నిలిచిపోతుందని అభిప్రాయపడ్డారు. మరోవైపు కాంగ్రెస్​ మాత్రం బిల్లు ఆమోదంపై తీవ్ర అభ్యంతరం వ్యక్తం చేసింది. చరిత్రలో చీకటి రోజుగా అభివర్ణించింది.

కీలకమైన పౌరసత్వ సవరణ బిల్లు-2019కు రాజ్యసభ ఆమోదం తెలిపింది. ఓటింగ్‌ సమయంలో సభలో 224 మంది సభ్యులు ఉండగా.. బిల్లుకు అనుకూలంగా 125 మంది, వ్యతిరేకంగా 99 మంది ఓటు వేశారు.

భారత్​లోని పాకిస్థాన్, బంగ్లాదేశ్​, అఫ్గానిస్థాన్​ దేశాల ముస్లిమేతరులకు దేశ పౌరసత్వం కల్పించేందుకు ఈ బిల్లును తీసుకువచ్చింది కేంద్రం. బిల్లు ఆమోదంపై ప్రధాని నరేంద్ర మోదీ, అమిత్​షా సహా సర్కారు హర్షం వ్యక్తం చేసింది. కాంగ్రెస్​ మాత్రం చరిత్రలో చీకటి రోజుగా అభివర్ణించింది. ఆమోదంపై ఎవరేమన్నారంటే..

'మరో మైలురాయి'

మోదీ ట్వీట్

భారతదేశానికి ఇది ఒక మైలురాయి. దేశ సౌభ్రాతృత్వానికి ప్రతీక. పౌరసత్వ సవరణ బిల్లు ఆమోదం పొందడం ఆనందంగా ఉంది. బిల్లుకు అనుకూలంగా ఓటు వేసిన వారందరికీ కృతజ్ఞతలు. ఏళ్లుగా మతపీడనను ఎదుర్కొంటున్న వారికి ఈ బిల్లు ఉపశమనం. - ప్రధాని మోదీ ట్వీట్

'కలలు నెరవేరాయి'

అమిత్​ షా ట్వీట్

పౌరసత్వ సవరణ బిల్లు ఆమోదంతో ఎన్నోఏళ్ల నుంచి పీడన ఎందుర్కొంటున్న కోట్లమంది కలలు నెరవేరాయి. వారి భద్రతకు, గౌరవానికి భరోసా కల్పించినందుకు ప్రధాని మోదీకి కృతజ్ఞతలు. మద్దతు పలికిన వారందరికీ ధన్యవాదాలు. - కేంద్ర హోంమంత్రి అమిత్​ షా ట్వీట్​

'చరిత్రలో చీకటి రోజు'

పౌరసత్వ సవరణ బిల్లుకు ఆమోదం పొందిన ఈ దినం చరిత్రలో చీకటి రోజుగా మిగిలిపోతుంది. సంకుచిత భావాలు, మతవైర శక్తులు సాధించిన విజయం ఇది. దేశ మూలాలనే ఈ బిల్లు సవాల్​ చేస్తోంది. - సోనియా గాంధీ, కాంగ్రెస్​ అధ్యక్షురాలు (పత్రికా ప్రకటనలో)

• ఇదీ చూడండి: ఆ రాష్ట్రానికి వెళ్లాలంటే ఇక అనుమతి తప్పనిసరి