రాష్ట్రీయ జనతాదళ్(ఆర్జేడీ) నేత, బిహార్ మాజీ సీఎం లాలూ ప్రసాద్ యాదవ్ చికిత్స పొందుతున్న ఆసుపత్రిలో ఓ రోగికి కరోనా సోకడం కలకలం రేపింది. కొవిడ్ పాజిటివ్ వచ్చిన రోగికి చికిత్స చేసిన డాక్టర్ ఉమేష్ ప్రసాదే.. లాలూకు కూడా వైద్య సేవలందిస్తున్నారు.
వివరాల ప్రకారం రిమ్స్ ఆసుపత్రికి వచ్చిన ఓ రోగికి సోమవారం రాత్రి కరోనా సోకినట్లు తేలింది. వెంటనే అతడిని కరోనా కేంద్రానికి తరలించారు. అప్రమత్తమైన అధికారులు.. ఇప్పటికే లాలూను పర్యవేక్షిస్తున్న డాక్టర్ ఉమేష్ బృందంలోని వైద్యులందరినీ క్వారంటైన్కు పంపించారు. కొవిడ్ పరీక్షల నిమిత్తం వారి నమూనాలు సేకరించారు. వైద్యబృందంలో ఎవరికైనా కరోనా పాజిటివ్గా నిర్ధరణ అయితే.. లాలూకు కూడా పరీక్షలు నిర్వహించనున్నట్లు ఆసుపత్రి యాజమాన్యం ప్రకటించింది.
జైలు నుంచి ఆస్పత్రికి...
దాణా కుంభకోణం కేసులో జైలుశిక్ష అనుభవిస్తున్న లాలూ కొంతకాలంగా అనారోగ్యాంతో బాధపడుతున్నారు. ఝార్ఖండ్ రాంచీ నగరంలోని రాజేంద్ర ఇన్‌స్టిట్యూట్ ఆఫ్ మెడికల్ సైన్సెస్(రిమ్స్)లోని పేయింగ్ వార్డులో చికిత్స పొందుతున్నారు.
