ఉత్తరాఖండ్లో వ్యూహాత్మక ప్రాముఖ్యం ఉన్న రహదారిని రక్షణ మంత్రి రాజ్నాథ్ సింగ్ ప్రారంభించారు. 17 వేల అడుగుల ఎత్తులో ఉన్న లిపులేఖ్ పాస్ను కలిపేలా చైనా సరిహద్దు వెంబడి 80 కిలోమీటర్ల మేర ఈ రోడ్డు నిర్మించారు.
కైలాస యాత్రకు తగ్గిన సమయం..
దిల్లీ నుంచి వీడియో కాన్ఫరెన్స్ ద్వారా ప్రారంభోత్సవంలో పాల్గొన్న రాజ్నాథ్ సింగ్.. స్థానికులు, యాత్రికుల దశాబ్దాల కల నేరవేరిందని అన్నారు. టిబెట్లోని కైలాస మానస సరోవర్ యాత్రా సమయం ఈ రోడ్డు కారణంగా తగ్గుతుందని తెలిపారు. ఈ ప్రాంతంలో ఆర్థిక వృద్ధికి ఊతమిస్తుందని అభిప్రాయపడ్డారు.
ఉత్తరాఖండ్లోని ఘటియాబాగఢ్ నుంచి ప్రారంభమయ్యే ఈ రోడ్డు లిపులేఖ్పాస్ వద్ద ముగుస్తుంది. అక్కడి నుంచి మానస సరోవర్ 90 కిలోమీటర్ల దూరం ఉంటుంది. సాధారణంగా సరోవర్ వెళ్లేందుకు 3 వారాలు పడుతుంది. ఈ మార్గం ద్వారా వారంలోనే యాత్రికులు సరోవర్ను దర్శించుకోవచ్చు.
సైనిక అవసరాలు..
చైనా సరిహద్దు ఉన్న కీలకమైన ఈ ప్రాంతంలో భద్రతా దళాల తరలింపు సులభమవుతుందని సైనిక అధికారులు చెబుతున్నారు. కఠినమైన హిమాలయాల్లో తవాఘాట్లోని మంగ్తి క్యాంప్, వ్యాస్ లోయలోని గుంజీతోపాటు సరిహద్దుల్లోని భద్రతా స్థావరాలకు ప్రయాణం సులభమవుతుంది.
2008లోనే ప్రారంభించిన ఈ రహదారిని 2013లో పూర్తి చేయాలని లక్ష్యంగా పెట్టుకున్నారు. కానీ నాజాంగ్- బుండీ మధ్య కఠిన పరిస్థితుల కారణంగా నిర్మాణంలో ఆలస్యమైంది.
